Der Nibelunge Nôt

10. Aventiure

___________________________________________________

Aventivre wie der kvnec gvnther zv wormze

mit frov prvnhilt prvtte

579

Anderthalp des rines | sach man mit manigen sharn

den chvnich mit sinen gesten | zv dem stade varn

ovch sah man da bi zovme | leiten manige meit

di si enpfahen solden | di waren alle bereit

580

do di von islande | cen sehffen chomen dan

vnt ovch von nibelvngen | di sifrides man

si gahent zv dem lande | vmmvezech wart ir hant

da man des chvniges vrivnde | des stades anderthalben vant

581

nv hoeret ovh disiv maere | von der chvnegin

vten di richen | wi si div magedin

frvmte von der bvrge | dar si do selbe reit

da gewan ein ander chvnde | vil manich riter vnt meit

582

der herzoge gere | crimhilt zvomte dan

niwar fver daz bvrgetor | sifrit der chvene man

der mvst ir fverbaz dienen | si was ein shone chint

des wart im wol gelonet | von der ivnchvrowen sint

583

ortwin der chvne | bi vrov vten reit

vil gesellechlichen | manich riter vnd meit

ce so grozem antpfange | des wir wol mvegen iehen

wart nie so vil der vrowen | bi einander gesaehen

584

vil manich bvhvrt richer | wart da getriben

von helden loblichen | niht wol daz waere beliben

vor crimhilt der vil shonen | zv den schiffen dan

do hvp man von den moeren | manige vrowen wolgetan

585

der chvnich was chomen veber | vnt manich werder gast

hei waz starcher sheffte | vor den vrowen brast

man hort da hvrtechlichen | von schilden manigen stoz

hey waz richer pvkelen | vor gedrange lvt erdoz

586

di vil minnechlichen | stvnden an der habe

gvnther mit sinen gesten | gie von den shiffen abe

er fvrte prvnhilden | selb an siner hant

da lvhte wider einander | vil lieht stein vnt gewant

587

mit vil grozen zvehten | vrov crimhilt do gie

do si vrovn prvnhilden | von ir gesinde enpfie

man sach da shapel rvcken | mit liehten henden da

si sich chvsten beide | daz wart dvrch zvht getan

588

do sprach gezogenliche | crimhilt daz maegedin

ir svlt zv disen landen | vns willechomen sin

mir vnt miner mvter | vnt allen di wir han

der getriwen frivnde | do wart nigen getan

589

di vrowen sich beviengen | mit armen dike hie

so minnechlich enpfahen | gehorte man noch nie

so di vrowen baeide | der brvete taten chvnt

vrov vote vnt ir tohter | di chvsten dicke ir sovzen mvnt

590

do frov prvnnhilt | vol chom vf den sant

si wart vil minnechlichen | genomen bi der hant

von waetlichen recken | manich wip wolgetan

man sach di schonen maegede | vor vrovn prvnnhilde stan

591

e daz ir grvz ergienge | daz was ein lange stvnt

ia wart da gechvsset | manich rosevarwer mvnt

noch stvnden bi einander | di chvniges tohter rich

daz liebte an ce saehene | vil manigem recken lobelich

592

do spaehten mit den ovgen | di e horten iehen

daz si also shones | niht mer haeten gesaehn

so di vrowen beide | des iach man ane lvge

ovch chos man an ir libe | da dehaeiner slahte trvge

593

di vrowen spaehen chvnden | vnt minnechlichen lip

di lobten dvrch ir shoene | daz gvntheres wip

do sprachen da di wisen | di haeten iz baz gesaehen

man moehte crimhilden | vor vrovn prvnnhilden iehen

594

wider einander wol giengen | magt vnt wip

man sach da vol gecieret | vil manigen shonen lip

da stvnden siden hvetten | vnd manech rich gcelt

der was gar erfvellet | vor wormez daz velt

595

vor des chvneges magen | wart dringen da getan

do hiez man prvnnhilde | vnt criemhilde gan

vnt mit in alle di vrowen | da man schate vant

da brahten si di daegene | vzer bvrgvnden lant

596

nv waren ovch di geste | ce rosse alle chomen

vil manich richiv tiost | dvrch shilt wart genomen

daz velt begonde stivben | sam ob al daz lant

mit lovge waer erbrvnnen | da wurden helde wol bechant

597

des da di recken pflagen | daz sach da manich meit

mich dvnchet daz her sifrit | mit sinen daegen reit

vil manige widerchaere | fver di hvetten dan

er fvrt der nibelvnge | tvsent waetlicher man

598

do chom von tronege hagene | als im der wirt geriet

den bvorhvrt minnechliche | do der helt geshiet

daz si vngestovbet liezzen | div vil schonen chint

des wart do von den gesten | gevolget gvetliche sint

599

do sprach der herre gernot | div ros lazet stan

vnz ez beginne chivelen | so svl wir anevan

dienen shonen wiben | fvr den palas wit

so der chvenich welle riten | daz ir vil bereite sit

600

do der bvhvrt was cergangen | veber al daz velt

do giengen chverzewilen | vnder manich gecelt

di ritter zv den vrowen | vf hoher vrevden wan

da vertriben si di stvnde | vnz si wolden riten dan

601

vor abendes nahen | do div svnne nidergie

vnt ez begonde chvolen | niht langer man daz lie

sich hvop gegen der bverge | manich man vnt wip

mit ovgen wart getrivtet | vil maniger shonen vrowen lip

602

da wart von gvten helden | vil chleider ab geriten

von den hochgemveten | nach des landes siten

vnze fvr den palas | der chvnich niderstvnt

da wart gedient den vrowen | so helde hochgemvete tvnt

603

do wurden ovch geshaeiden | di richen chvnegin

vrov vote vnt ir tohter | di giengen beide hin

mit ir ingesinde | in ein vil witez gadem

do horte man allenthalben | ce vrevden grozen chradem

604

gerihtet wart daz gesidele | der chvnich wolde gan

ce tisshe mit den gesten | do sach man bi im stan

di shonen prvnnhilde | crone si do trvch

in des chveneges lande | ia was si rich genvch

605

vil manich hergesidele | mit gvten tavelen bereit

von spise wart gesezet | als vns ist geseit

des si da haben solden | wi wenech des gebrast

do sach man bi dem chvnege | vil manigen herlichen gast

606

des wirtes chameraere | in becken von golde rot

daz wazer fvr trvogen | des waere lvcel not

ob iv daz iemen sagte | daz man diente baz

ce fvrsten hochgecite | ich wolte niht gelovben daz

607

e daz der vogt von rine | wazer do genam

do tet der herre sifrit | als im do gezam

er mant in siner triwe | wes er im veriach

e daz er prvnnhilt | da heime in islande sach

608

er sprach ir svlt gedenchen | des mir swuor iwer hant

swenne vrov prvnnhilt | choeme in diz lant

ir gaebet mir iwer swester | wa sint di eide chomen

ich han an iwer reise | michel arbeit genomen

609

do sprach der chvnich cem gaste | ir habet mich reht ermant

ia ne sol niht meinaeide | werden des min hant

ich wil iz iv fvegen | so ich allerbeste chan

do hiez man criemhilde | ce hove fver den chvnich gan

610

mit ir vil schonen maegden | si chomen fver den sal

do spranch von einer stiege | giselher ce tal

nv haeizet widerwenden | disiv maegedin

niwan min swester eine | sol bi dem chvnege sin

611

do braht man criemhilde | da man den chvnich vant

do stvnden ritter edele | von maniges fversten lant

in dem sal witen | man hiez si stille stan

do was div vrov prvnnhilt | wol hin vnz an den tissch gegan

612

do sprach der kvnich gvnther | swester vil gemeit

dvrch dine selbe tvgende | lose minen eit

ich swur dir einen recken | vnt wirdet der din man

so hastv minen willen | mit vil grozen triwen getan

613

do sprach div maget vil edele | vil lieber brvder min

ir svlt mich niht pflaegen | ia wil ich immer sin

swi ir mir gebietet | daz sol sin getan

ich wil in loben gerne | den ir mir herre gebet ce man

614

von lieber ovgenblicke | wart sifrit varwe rot

ce dienste sich der recke | vron criemhilde bot

man hiez si zv einander | an einen rinch do gan

man vragte ob si gerne naeme | den vil vaetlichen man

615

in magtlichen zvehten | shamte si sich ein teil

iedoch was gelvcke | vnt sifrit vil geil

daz si in niht versprechen | wolde al da cehant

ovch lobte si ce wibe | der edel chvenich von niderlant

616

do er si gelobte | vnt ovch in div meit

gvetlich vmbevahen | was da vil bereit

von sifrides armen | daz minnechliche chint

von helden wart gechvesset | div shone crimhilt sint

617

sich teilte daz gesinde | also daz geshah

an daz gegensiedele | man sifride sah

mit criemhilde sitcen | dar diente manich man

man sach di niebelvnge | mit samt sifride gan

618

der chvnich was gesezen | vnt brvennhilt div meit

do sah si criemhilde | do ne wart nie so leit

bi sifride sitzen | weinen si began

ir vielen heize traehene | vber liehtiv wange dan

619

do sprach der wirt des landes | vil liebiv vrowe min

warvmbe lat ir trveben | vil liehter ovgen shin

ir mvget ivch vrevn balde | iv ist vndertan

min lant vnt mine bvrge | vnt manich waetlicher man

620

ich mach wol balde waeinen | sprach div shoniv meit

vmb dine svester | ist mir von hercen leit

di sihe ich nahen sitzen | dem eigenholden din

daz mvz ich imer weinen | sol si also verdaerbet sin

621

do sprach der chvnich gvnther | ir mvegt wol stille dagen

ich wil iv zandern ziten | disiv maere sagen

warvmb ich mine swester | sifride han gegaeben

ia mach si mit dem recken | immer vrolichen laeben

622

si sprach mich iamert immer | ir shone vnt ovch ir zvht

wess ich war ich mohte | ich haete gerne flvht

daz ich iv nimmer wolde | geligen nahen bi

irn saget mir wavon criemhilt | div sifrides wine si

623

do sprach der chvnich edele | ich tvn iz iv wol bechant

er hat als wol bverge | als ich vnt witiv lant

daz wizet sicherliche | er ist ein chvnich rich

darvmb gan ich im ce minnen | di schonen magt lobelich

624

swaz ir der chvnich sagete | si hete trveben mvt

do gahte von den rossen | vil manich ritter gvt

ir bvhvrt wart so herte | daz al div bvrch erdoz

den wirt bi sinen gesten | vil harte sere verdroz

625

er dahte er laege sanpfer | der schonen vrowen bi

do was er des gedingen | niht gar in hercen vri

im mvse von ir schvlden | liebes vil geshaehen

er begonde vrivntlichen | an vrovn prvnhilde saehen

626

ir ritterschapf di geste | bat man abelan

der chvnich mit sinem wibe | ce bette wolde gan

vor des sales stigen | gesamenten si sich sit

criemhilt vnt prvnnhilt | noch was iz an ir beider nit

627

do chom ir ingesinde | di ne svmten sich des niht

ir richen chamaeraere | brahten in div lieht

sich teilten do di recken | der zweir chvnige man

do sach man vil der daegene | danne mit sifride gan

628

die herren chomen beide | da si solden ligen

do gedaht ietslicher | mit minnen angesigen

den minnechlichen vrowen | daz sempftet in den mvt

sifride chverzewile | div wart vil grozliche gvt

629

do der herre sifrit | bi criemhilde lach

vnt er so minnechliche | der ivnchvrowen pflach

mit sinen edelen minnen | si wart im so sin lip

er naeme fvr si eine | niht tvsent andriv wip

630

ich sag iv niht mere | wi er der vrowen pflach

nv horet disiv maere | wi gvnther gelach

bi vrovn prvnnhilde | der ciere daegen

er haete dicke sampfter | bi andern wiben gelaegen

631

daz volch was im entwichen | vrowen vnt man

do wart div chemenate | vil balde zv getan

er wande er solde trivten | ir vil minnechlichen lip

ia was iz nach vnnahen | e si wurde sin wip

632

in sabenwizem hemede | si an daz bette gie

do daht der ritter edele | nv han iz alliz hie

des ich ie da gert | in allen minen tagen

si mvst im von ir shoene | von grozen schvlden wol behagen

633

div lieht begonde bergen | des edeln chvniges hant

do gie der daegen chvene | da er di vrowen vant

er leite sich ir nahen | sin vrevde div was groz

di vil minnechlichen | der helt mit armen vmbesloz

634

minnechlich trivten | des chvnd er vil began

ob in div edele vrowe | hete lazzen daz getan

da zvrnde si so sere | daz in gemvete daz

er wande vinden frivnde | do vant er vintlichen haz

635

si sprach ritter edele | ir svlt iz lazen stan

des ir da habet gedingen | ian mag es niht ergan

ich wil noch magt beliben | ir svlt wol merchen daz

vnz ich div maer erfinde | do wart ir gvnther gahaz

636

do rang er nach ir minne | vnt cerfvrt ir div chleit

do greif nach einem gvrtel | div herlichiv meit

daz was ein starcher porte | den si vmb ir siten trvch

do tet si dem chvnige | grozer leide genvch

637

di fvoze vnt ovch di hende | si im cesamne bant

si truoch in ceinem nagel | vnt hiench in an di want

do er si slaffes irrite | di minne si im verbot

ia het er von ir creffte | vil nach gewunnen den tot

638

do begond er vlegen | der meister wande sin

nv loeset min gebende | vil edliv chvnegin

ine truwe iv doch shoniv vrowe | nimmer an gesigen

vnt sol ovch harte selten | iv so nahe mer geligen

639

si ne rvchte wi im waere | want si vil sanfte lach

dort mvst er allez hangen | di naht vnz an den tach

vnz der liehte morgen | dvrh div venster shein

ob er ie crapft gewunne | div was an sinem libe chlein

640

nv sagt mir her gvnther | ist iv daz iht leit

ob ivch gebvnden fvnden | sprach div shone meit

di iwern chameraere | von einer vrowen hant

do sprach der ritter edele | daz wurd iv vebele bewant

641

ovch het ih es wenich ere | sprach der snelle man

dvrch iwer selber tvgende | nv lat mich zv iv gan

sit daz iv mine minne | sint also starche leit

ich sol mit minen henden | nimmer rveren iwer chleit

642

do losete si im balde | vnt do sin vf verlie

wider daz bette | er zv der vrowen gie

er leite sich so verre | daz er ir schone wat

darnach vil selten rvrte | des wold ovch si do haben rat

643

do chom ovch ir gesinde | di brahten in niwiv chleit

der was in an den morgen | harte vil bereit

swi wol man da gebarte | trvrech was genvch

der herre von dem lande | swi er des tages crhone trvch

644

nach siten der si pflagen | vnt man dvrch reht begie

gvnther vnt prvnnhilt | niht langer daz en lie

si giengen zv dem mvnster | da man di messe sanch

dar chom ovch her sifrit | sich hvp da grozlich gedranch

645

nach chvnechlichen eren | was in dar bereit

swaz si da haben solden | ir chrone vnt ovch ir chleit

do wurden si gewihet | da daz was getan

do sach man alle si viere | vnder chrone vrolichen stan

646

vil ivnger swertdegen da namen | sehs hvndert oder baz

den chvnegin al ce den eren | ir svlt wol wizzen daz

sich hvp vil michel vrevde | in der bvrgende lant

man horte da scheffte hellen | an der swertdaegene hant

647

do sazen in den venstern | div schonen maegedin

si sahen vor in livhten | vil maniges schildes schin

do het sich gescheiden | der chvnich von sinen man

swes iemen ander pflaege | man sah den chvnich trvrende gan

648

im vnt sifride | vngelich stvnt der mvt

wol wesse waz im waere | der edel ritter gvt

do giench er zv dem chvnige | vragen er began

wi ist iv hint gelvngen | daz svlt ir mich nv wizen lan

649

do sprach der wirt ce dem gaste | ich han laster vnt shaden

want ich han den vbeln tivel | heim ce hvse geladen

do ich si wande minnen | vil sere si mich bant

si trvoch mich ceinem nagele | vnt hie mich hohe an di want

650

da hie ich angestliche | di naht vnz an den tach

e daz si mich embvnde | wi samfte si do lach

daz sol dir vrivntliche | vf genade sin gechleit

do sprach der starche sifrit | ez ist mir werliche leit

651

des bringe ich dich wol innen | vnt lezestv iz ane nit

ich shaffe daz si hintz | so nahe bi dir gelit

daz sie dich ir minne | gesvmet nimmer mer

der rede was do gvnther | nach sinen arbeiten her

652

do sprach der herre sifrit | dv maht wol genesen

ich wene vns vngeliche | hinat si gewesen

mir ist din swester crimhilt | lieber danne der lip

ez mvz div vrowe prvnnhilt | noch hinat werden din wip

653

er sprach ich chvm noch hinte | ce der chemenaten din

also tovgenlichen | in der tarnkappen min

daz sich miner liste | mach niemen wol versten

so la di chameraere | vz zv ir herberge gen

654

so lessche ich den chinden | div lieht an der hant

daz ich si darinne | dabi si dir bechant

daz ich dir gerne diene | so twinge ich dir din wip

daz dv si hinte minnest | oder ich verlivse minen lip

655

ane daz dv iht trvetest | sprach der chvnich do

di mine lieben vrowen | anders pin ich es vro

so tv ir swaz dv wellest | vnt naemest ir den lip

daz sold ich wol verchiesen | si ist ein vreislichez wip

656

daz nim ich so sprach sifrit | vf di triwe min

daz ich ir niht en minne | div shone swester din

div ist mir vor allen | di ich noch ie gesach

vil wol gelovbte der chvenich gvnther | daz sifrit gesprach

657

da was von kvrcewile | vrevde vnt not

bvhvrt vnt shallen | allez man verbot

da di vrowen solden | gegen dem sale gan

do hiezen di kameraere | di livte von dem wege stan

658

von rossen vnt von livten | gervmet wart der hoff

der vrowen ietsliche | di fvrt ein bissoff

do si vor den chvnegen | ce tissche solden gan

in volgete an daz gesidele | vil manich waetlicher man

659

der chvnich in gvtem wane | do vrolichen saz

daz im gelobte sifrit | wol daht er ane daz

der eine tach in dvhte | wol drizech tage lanch

an siner vrowen minne | stvnt aller sin gedanch

660

er erbeite chvme | daz man von tisshe gie

di schonen prvnnhilde | man do chomen lie

vnt ovch vrovn crimhilde | bede an ir gemach

hey waz man sneller daegne | vor den chvnegen sach

661

sifrit der herre | vil minnechlichen saz

bi sinem wibe | mit vrevden ane haz

si trvte sine hende | mit ir vil wizzer hant

vnze er ir vor den ovgen | si ne wesse wenne verswant

662

do si mit im spilte | vnt sis niht mer en sach

zv sinem gesinde | div chveneginne sprach

mich hat des michel wunder | wa der chvnich si bechomen

wer hat im di sinen hende | vz den minen genomen

663

di rede si lie beliben | do was er hin gegan

da er vil chameraere | mit den liehten vant stan

div begond er lehssen | den kinden an der hant

daz er waere sifrit | daz was gvnther bechant

664

wol wesse er waz er wolde | do hiez er dannen gan

maegede vnt vrowen | do daz was getan

der riche chvnech selbe | do besloz di tver

vil starcher rigel zwene | warf er snelle darfvor

665

div lieht verbarch er schiere | vnder di bette wat

eines spils begonde | des was do niht rat

sifrit der vil starche | vnt ovch div vil schoniv meit

daz was dem chvnige gvnther | beidiv lip vnt leit

666

sifrit der leit sich nahen | der ivnchvrowen bi

si sprach nv lat iz gvnther | als liep als ich iv si

daz ir iht arbeite | lidet alsam e

sit getet div vrowe | dem chvnen sifride we

667

do hal er sine stimme | daz er niht en sprah

gvnther wol horte | swi er sin niht en sah

daz heimlicher dinge | von in da niht geschach

si heten an dem bette | vil harte chleinen gemach

668

er gebarte sam ez waere | gvnther der chvnich rich

er vmbsloz mit armen | di magt lobelich

si warf in vz dem bette | da bi vf eine banch

daz im sin hovbt lvte | vf einem schamel erclanch

669

wider vf mit crepffen | spranch der chvne man

er wold iz baz versvchen | do er des began

daz er si wolde twingen | darvmbe wart im vil we

solech wer von deheiner vrowen | div waene immer mer erge

670

do er niht wold erwinden | div maget vf do spranch

ir en svlt mir niht cerfveren | min hemde so blanch

ir sit vil vngefvege | daz sol iv werden leit

des bringe ich ivch wol innen | sprach div waetlichiv meit

671

si besloz mit armen | den tiwerlichen daegen

do wold si in gebvnden | alsam den chvnich legen

daz si an dem bette | mohte haben gemach

daz er ir di wat cerfvrte | div vrowe iz grozlichen rach

672

waz half sin groziv sterche | vnt ovch sin groziv crapft

si erceigete dem degene | ir libes meisterschapft

si trvch in mit gewalte | daz mvs et also sin

vnt drvcht in gevoge | zwisschen di want vnd ein schrin

673

owe daht der recke | sol ich nv minen lip

von einer magt verliesen | so mvgen elliv wip

hernach immer mere | tragen gelffen mvt

gegen ir manne | div ez svs nimmer getvt

674

der chvnich ez wol horte | er angestete vmb den man

sifrit zvrnte sere | shamen er sich began

mit vngefveger crepfte | sazt er sich wider

er versvchtez angestiliche | an vrovn prvnnhilde sider

675

den chvnich ez dvhte lange | e er si betwanch

si drvcht im sine hende | daz vz den nageln sprach

daz plvt im von ir crepfte | daz was dem helde leit

sit braht er an ein lovgen | di vil herlichen meit

676

ir vngefveges willen | des si e da iach

der kvnich iz allez horte | swi er niht en sprach

er druchtes an daz bette | daz si vil lvte schre

ir taten sine crepfte | harte grozlichen we

677

do greif si hinz ir siten | da si den porten vant

vnt wolt in han gebvnden | do wert ez so sin hant

daz ir div lid ercrachten | vnt ovch al der lip

des wart der strit gescheiden | do wart si gvntheres wip

678

si sprach chvnich edele | dv solt mich laeben lan

ez wirt vil wol versvenet | swaz ich dir han getan

ich en gewer mich nimmer maere | der aedelen minne din

ich han daz wol erfvnden | daz dv chanst vrowen meister sin

679

sifrit stvnt dannen | ligen lie er di meit

sam er von im ziehen | wolde vil gar siniv chleit

er zoch ir abe ir hende | ein gvldin vingerlin

daz si des nie wart innen | div edle chvnegin

680

darzv nam er ir gvrtel | daz was ein porte gvt

ine weiz ob er daz taete | dvrh sinen hohen mvt

er gab iz sinem wibe | daz wart im sider leit

do lagen bi einander | gvnther vnt div schoniv meit

681

er pflach ir minnechlichen | als im daz gezam

do mvst si verchiesen | ir zorn vnt ovch ir sham

von siner heimliche | si wart ein lvocel bleich

hey waz ir von der minne | ir grozen crepffte entweich

682

do ne was ovch si niht staercher | dann ein ander wip

er trvte minnechliche | den ir vil shonen lip

ob siz versvchte maere | waz chvnde daz vervan

daz het ir allez gvnther | mit sinen minnen getan

683

wi rehte minnechliche | si do bi im lach

mit vrivntlicher liebe | vnz an den liehten tach

nv was der herre sifrit | wider vz gegan

da er wol wart entpfangen | von einer vrowen wolgetan

684

er vnderstvnt ir vrage | der si haete gedaht

er hal si sit vil lange | daz er ir haete braht

vnz daz si vnder chrone | in sinem lande gie

swaz er ir gaeben solde | wi lvcel erz beliben lie

685

der wirt wart an dem morgen | verrer baz gemvt

danne er davor waere | des wart div vrevde gvt

in allem sinem lande | von manigem edlem man

di er ce hvse ladete | den wart vil dieneste getan

686

div hohzit do waerte | vnz an den viercehenden tach

daz in al der wile nie | der shal gelach

von allerhende vrevden | der iemen solde pflaegen

do wart des chvneges choste | vil harte hohe gewaegen

687

des edelen wirtes mage | als ez der chvenich gebot

den gaben dvrch sin ere | chleider vnt golt vil rot

ross vnt darzv silber | vil manigem vremdem man

di da gabe gerten | di shieden vrolichen dan

688

sifrit der herre | vzer niderlant

mit tvsent sinen mannen | alliz ir gewant

daz si ce rine brahten | wart alliz hin gegaeben

vnt ovch div ross mit saetelen | si chvnden herliche leben

689

e daz man di riche gabe | alle da verswanch

di wider ce lande wolden | di dvhte des ce lanch

ez en wart nie geste | maere baz gepflaegen

so endete sich div hohzit | daz wolde gvnther der daegen