Der Nibelunge Nôt

2. Aventiure

___________________________________________________

Aventivre von sivride

wie der erzogen wart

20

Do wuohs in niderlanden | eins vil edelen kvneges kint

des vater der hiez sigemvnt | sin mvoter sigelint

in einer richen bverge | witen wol bechant

nidene bi dem rine | div was ze santen genant

21

sivrit was geheizen | der snelle degen gvot

er versvochte vil der riche | dvrch ellenthaften mvot

dvrh sines libes sterche | er reit in menegiv lant

hey waz er sneller degene | sit cen bvrgonden vant

22

in sinen besten ziten | bi sinen ivngen tagen

man mohte michel wunder | von siveride sagen

waz eren an im wuechse | vnt wi scoene was sin lip

sit heten in ce minne | div vil waetlichen wip

23

man zoch in mit dem vlize | als im daz wol gezam

von sin selbes mvote | waz tvgende er an sich nam

des wurden sit gezieret | sines vater lant

daz man in ze allen dingn | so rehte herlichen vant

24

er was nv so gewachsen | daz er ze hove reit

di livte in sahen gerne | manech frovwe vnt manech meit

im wunschten daz sin wille | in immer trvege dar

holt wurden im genvoge | des wart der herre wol gewar

25

vil selten ane hvote | man riten lie daz kint

in hiez mit chleidern ziern | sigmvnt vnt siglint

sin phlagen ovch di wisen | den ere was bechant

des moht er wol gewinnen | beide livte vnde lant

26

nv was er in der sterche | daz er wol wafen trvoch

swes er darzvo bedorfte | des lag an im genvoch

er begvnde mit sinnen | werben scoeniv wip

di trvten wol mit eren | des chvenen sivrides lip

27

do hiez sin vater sigmvnt | chvnden sinen man

er wolde hohgecite | mit liebn vriwenden han

div maere man do fvorte | in ander chvnege lant

den vremden vnt den chvnden | gab er ross vnt gvot gewant

28

swa man vant deheinen | der riter solte sin

von art der sinen mage | div edeln kindelin

div ladet man zvo dem lande | dvrh di hohgecit

mit dem ivngen kvnege | swert genamen si sit

29

von der hohgecite | man mohte wunder sagn

sigmvnt vnde siglint | di mohten wol beiagn

mit gvote michel ere | des teilte vil ir hant

des sach man vil der werden | nv zin riten in daz lant

30

vier hvndert swertdegene | di solden tragn chleit

mit samt sivride | vil manech scoeniv meit

von werche was vnmvezech | wan si im waren holt

vil der edelen steine | die frovwen leiten in daz golt

31

die si mit porten wolten | wurchen vf ir wat

den ivngen stolzen rechen | des ne was niht rat

der wirt der hiez do sideln | vil manegn chvenen man

ce einen svnewenden | da sin svn sivrid wol riters namn gewan

32

do gie ce einem mvenster | vil manech richer chneht

vnt manech edel riter | di wisen hetn reht

daz si den tvmben dienten | als in was e getan

si heten chvrzewile | vnd ovch vil maneger vrevden wan

33

got man do cen ern | eine messe sanch

do hvop sih von den livten | vil michel der gedranch

da si ce riter wurden | nah riterlicher e

mit also grozen ern | daz waetlich immer mer erge

34

si liefen da si fvnden | gesatelt manech march

in hove sigmvndes | der bvhvrt wart so starch

daz man erdiezen horte | palas vnde sal

di hohgemvoten degene | di heten grozlichen schal

35

von wisen vnt von tvmben | man horte manegen stoz

daz der scefte brechen | gein den lveften doz

trvonzvne sach man vliegen | fver den palas dan

von maneges rechen hende | daz wart mit vlize getan

36

der wirt der bat ez lazen | do zoch man div march

man sach ovch da cebrochen | vil manege bvkel starch

vil der edelen steine | gevellet vf daz gras

ab liehten schildes spangen | von hverten daz gescehen was

37

do giengens wirtes geste | da man in sizzen riet

vil der edelen spise | si von ir mvede sciet

vnt win der allerbeste | des man in vil getrvoch

den vremden vnt den chvnden | bot man ern genvoch

38

swi vil si chvrzwile | pflagn al den tach

vil der varender diete | ruowe sich bewach

si dienten nach der gabe | di man da riche vant

des wart mit lobe gezieret | allez sigmvnds lant

39

der herre der hiez lihen | sivrit den ivngen man

lant vnde bvrge | als er het e getan

sinen swertgenozen | den gap do vil sin hant

do liebt in div reise | daz si chomn in daz lant

40

div hohgecit div werte | vnz an den sibenden tach

siglint div riche | nach alten siten pflach

dvrh ir svns liebe | teilen rotez golt

si chvndez wol gedienen | daz im div livte waren holt

41

vil lvcel man der varnder | armen da vant

ross vnd chleider | daz stovb in von der hant

sam si ce lebne heten | niht mer deheinen tach

ich waen ie ingesinde | so grozer milte gepflach

42

mit loblichen eren | sciet sich div hohgecit

von den richen herrn | horte man wol sit

daz si den ivngen wolden | ce eime herren han

des en gerte niht her sivrit | der vil waetliche man

43

sit daz noch beide lebten | sigmvnt vnt siglint

niht wolde tragen chrone | ir beider liebez chint

doch wolder wesen herre | fver allen den gewalt

des in den landen vorhte | der degen chven vnd balt