Requeste au Prince

(Requeste a Monseigneur de Bourbon)

1461

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Requeste a Monseigneur de Bourbon

Le mien seigneur et prince redoubté,

Fleuron de lys, royalle geniture,

François Villon, que Travail a dompté

A coups orbes, par force de bature,

5

Vous supplie, par ceste humble escripture,

Que lui faciez quelque gracieux prest.

De s'obliger en toutes cours est prest;

Si ne doubtez que bien ne vous contente:

Sans y avoir dommaige n'interest,

10

Vous n'y perdrez seulement que l'attente.

A prince n'a ung denier emprunté,

Fors a vous seul, vostre humble creature.

De six escus que luy avez preste,

Cela pieça il meist en nourriture.

15

Tout se paiera ensemble, c'est droiture,

Mais ce sera legierement et prest;

Car, si du glan rencontre en la forest

D'entour Patay, et chastaignes ont vente,

Paié serez sans delay ny arrest:

20

Vous n'y perdrez seulement que l'attente.

Se je peusse vendre de ma santé

A ung Lombart, usurier par nature,

Faulte d'argent m'a si fort enchanté

Qu'en prendroie, ce cuide, l'aventure.

Argent ne pens a gippon n'a sainture;

Beaux sire Dieux! je m'esbahis que c est

Que devant moy croix ne se comparoist,

Si non de bois ou pierre, que ne mente;

Mais s'une fois la vraye m'apparoist,

30

Vous n'y perdrez seulement que l'attente.

Prince du lys, qui a tout bien complaist,

Que cuidez vous comment il me desplaist

Quant je ne puis venir a mon entente?

Bien entendez; aidez moy, s'il vous plaist:

35

Vous n'y perdrez seulement que l'attente.

Suscription de ladicte requeste

Allez, lettres, faictes ung sault;

Combien que n'ayez pié ne langue,

Remonstrez en vostre harangue

Que faulte d'argent si m'assault.