Ballade de bon conseil

1462

Texte:

François Villon, Oeuvres

Édition critique avec notices et glossaire

par Louis Thuasne, Paris: Auguste Picard 1923

Fac-similé: Internet Archive

__________________________________________________________________________________

Ballade de bon conseil

Hommes faillis, despourveuz de raison,

Desnaturez et hors de congnoissance,

Desmis du sens, comblez de desraison.

Fols abusez, plains de descongnoissance,

5

Qui procurez contre vostre naissance,

Vous soubzmettans a detestable mort

Par lascheté, las! que ne vous remort

L'orribleté qui a honte vous maine?

Voyez comment maint jeune homs est mort

10

Par offenser et prendre autruy demaine.

Chascun en soy voye sa mesprison,

Ne nous venjons, prenons en pacience;

Nous congnoissons que ce monde est prison:

Aux vertueux franchis d'impacience

15

Battre, touiller, pour ce n'est pas science,

Tollir, ravir, piller, meurtrir a tort.

De Dieu ne chault, trop de verté se tort

Qui en telz faiz sa jeunesse demaine,

Dont a la fin ses poins doloreux tort

20

Par offenser et prendre autruy demaine.

Que vault piper, flater, rire en trayson,

Quester, mentir, affermer sans fiance,

Farcer, tromper, artifier poison,

Vivre en pechié, dormir en deffiance

25

De son prouchain sans avoir confiance?

Pour ce conclus: de bien faisons effort,

Reprenons cuer, ayons en Dieu confort,

Nous n'avons jour certain en la sepmaine;

De nos maulx ont noz parens le ressort

30

Par offenser et prendre autruy demaine.

Vivons en paix, exterminons discort;

Ieunes et vieulx, soyons tous d'ung accort:

La loy le veult, l'apostre le ramaine

Licitement en l'epistre rommaine;

35

Ordre nous fault, estat ou aucun port.

Notons ces points; ne laissons le vray port

Par offenser et prendre autruy demaine.