La Danse Macabre

Le mort.

Guidez vous de mort eschapper

Clerc esperdu / pour reculer

Il ne sen fault ia defripper.

Tel cuide souvent hault aller

Quon voit a cop tost raualler

Prenez en gre / alons ensemble

Car rien ny vault le rebeller

Dieu punit tout quant bon lui semble.

Le clerc.

Faut il qun ieusne clerc servant

Qui en service prent plesir

Pour cuider venir en avant

Meure si tost / cest desplesir

Je suis quitte de plus choisir

Aultre estat / il faut quainsi danse:

La mort ma pris a son loisir

Moult remaint de ce que fol pense.

Le mort.

Clerc poīt ne fault faire refus

De danser faicte vous valoir

Vous nestez pas seul / leves sus

Pour tāt moins voz en doit chaloir.

Venez apres / cest mon voloir

Homme noury en hermitaige

Ia ne vous en convient doloir:

Vie nest pas seur heritaige.

Le hermite.

Pour vie dure ou solitaire

Mort ne dōne de vivre espace.

Chascun le voit si sen fault taire

Or requier dieu qun don me face:

Cest que tous mes peschies efface

Bien suis cōtens de tous ses biens

Desquelx iay use de sa grace:

Qui na soueffisance il na riens.

Le mort.

Cest bien dit

ainsi doit on dire

Il nest qui soit

de mort delivre

Qui mal dit

il aura du pire:

Si pense chascun

de bien vivre.

Dieu pesera

tout a la livre

Bon y fait penser

soir et matin

Meilleure science

na en livre:

Il nest qui ait

point de demain.