La Danse Macabre

Le mort.

Ha maistre par la passeres

Nayez ia soing de vous deffendre

Ne iamais abbe ne seres.

Mourir vous fault sans plus actendre

Ou pensez vous cy fault entendre

Tantost aurez la bouche close.

Hōme nest fors que venl el cendre

Vie dhomme est moult peu de chose.

Le moinne.

Jamasse bien mieulx encore estre

En cloistre et faire mon service

Cest ung lieu devost et bel estre

Or ay ie comme fol et nice.

Du temps passe commis maint vice

De quoy nay pas fait penitance

Souffisant / dieu me soit propice

Chascun nest pas ioyeux qui danse.

Le mort.

Usurier de gens desrengles

Venez tost et me regardez.

Dusure estes tant aveugles

Que dargent gaignez tout ardez

Mais vous en seres bien lardez

Car se dieu qui est merveilleux

Na pitie de vous tout perdez

A tout perdre est cop perilleux.

Lusurier.

Me convient il si tost morir

Ce mest grāt peine et grevance

Et ne me pourvoit secourir

Mon or / mon argent / ma chevance,

Je vois morir la mort mavance

Mais il me desplait somme toute

Quest ce de male acoustumance

Tel a beaulx yeux qui ne voit goute.

Le povre hōme.

Usure est tant

maulvaiz pechie

Comme chascun

dit et raconte.

Et cest homme

qui approchie

Se sent de la mort

nen tient conte

Mesme largent

que ma main cōpte

Encore a usure

me preste

Il devra de retour

au compte

Nest pas quitte

qui doit de reste.