Cent Balades

Balade LXI - LXX

__________________________________________________

Balade LXI

Io fut une damoiselle

Que Jupiter ama moult fort.

Juno en ouÿ la nouvelle;

Se lie lui fu jeu ne deport

5

Du ciel descent en une nue

Pour son mary surprendre ou fait;

Sur eulx est tout a coup venue

Si les y eust surpris de fait;

Mais il n'est nul si grant meschief

10

Qu'on ne traye bien a bon chief.

Car Jupiter d'une cautelle

Se couvri; car il fist un sort

Par quoy il tresmüa la belle

En une vache, mais au fort

15

S'en est Juno si près tenue,

Qui souspeçon a du meffait,

Qu'elle a la vache retenue

Malgré que Jupiter en ait.

Mais il n'est nul si grant meschief

20

Qu'on ne traye bien a bon chief.

La vache en garde bailla celle

A Argus, qui jamais ne dort;

Cent yeulz avoit et la pucelle

Toudis gaitoit, mais il fu mort

25

Par Mercures qui l'en desnue,

Car au vachier tant tint de plait

Qu'il l'endort, puis l'a detenue;

Et ce fu a Juno moult lait.

Mais il n'est nul si grant meschief

30

Qu'on ne traye bien a bon chief.

Pour ce je di qu'une cenelle

Ne vault la garde tant soit fort,

Ne a vallet ne a basselle

Puis qu'ilz sont tous deux d'un acort,

35

L'amour d'eulz sera maintenue

Et verront, qui que dueil en ait,

L'un l'autre, et en est avenue

Mainte chose par tel agait;

Mais il n'est nul si grant meschief

40

Qu'on ne traye bien a bon chief.

Balade LXII

Ha! mon ami, que j'ay long temps amé!

Comment as tu le cuer si desloiauix,

Que moy qui t'ay si doulcement clamé

Ami long temps, tu me fais tant de maulz?

5

Parjur, mauvais, plein de mençonge et faulz,

On te devroit par dessus tous clamer,

De moy laissier ainsi pour autre amer.

Je t'avoye dessus tous affermé

Pour mon ami sur tous especiaulx,

10

Et tous jours t'ay chery et reclamé

De tout mon cuer qui t'a esté loyaulz;

Mais plus mauvais n'a n'en France n'en Caulx

Ne autre part, le cuer as trop amer

De moy laissier ainsi pour aultre amer.

15

Est donc ton cuer si pris et enflammé

De celle qui tant me fait de travaulx,

Que de s'amour soies si affamé

Que de moy fais contre elle petit taux?

Tu t'avances de ce faire a bas saulx,

20

Ce m'est avis, et te doit on blasmer

De moy laissier ainsi pour aultre amer.

Balade LXIII

Amours! Amours! ce m'as tu fait,

Qui m'as mis en si dur parti.

Se ne te feis je oncques meffait,

Et si ay tant de maulx parti

5

Largement m'en as departi;

Et qui te fait de son cuer don,

A il doncques tel guerredon?

Ton soulas est bien contrefait,

Il s'est de moy tost departi,

10

Contre le bien mal me reffait;

En grant doulour s'est converti,

Tu m'occis sanz dire «gar t'y!»

Va il ainsi qui te sert don,

A il doncques tel guerredon?

15

Et pour quoy, ne pour quel tort fait,

M'as tu un tel ami sorti,

Qui ma vie et mes jours deffait?

Car par lui suis en tel parti

Que tout mon sens est amorti.

20

Qui tu esprens de ton brandon,

A il doncques tel guerredon?

Balade LXIV

Sages et bons, gracieux et courtois,

Doivent estre par droit tous chevaliers;

Larges et frans, doulz, paisibles et cois,

Pour acquerir honneur grans voiagiers,

5

En fais d'armes entreprenans et fiers

Droit soustenir et deffendre l'Eglise

D'armes porter doit estre leur mestiers,

Qui maintenir veult l'ordre a droite guise.

Hanter les cours des princes et des roys,

10

Les fais des bons recorder voulentiers;

Estre doivent d'orphelins et de lois

Et des femmes deffendre coustumiers,

Acompagnier les nobles estrangiers,

Preux et hardiz et sanz recreandise,

15

Et voir disans, fermes, vrais et entiers,

Qui maintenir veult l'ordre a droite guise.

Et noblece dont il est si grant voix

Les doit tenir loiaulx et droituriers

Pour le renom qu'il est des bons françois

20

Leur doit estre tous pesans fais legiers,

Ne orgueilleux, vanteurs ne losengiers

Ne soient pas, car chascun trop desprise

Si fais mahains, bourdeurs ne noveliers,

Qui maintenir veult l'ordre a droite guise.

25

Telz chevaliers doit on avoir moult chiers

Dieu et les sains et le monde les prise.

Or suive donc toudis si fais sentiers,

Qui maintenir veult l'ordre a droite guise,

Balade LXV

Dame sanz per, ou tous biens sont assis,

A qui m'amour j'ay trestoute donnee,

Corps gracieux de doulz maintien rassis,

Belle beaulté doulcement atournee,

5

Que j'aim et craim plus qu'autre chose née,

Apercevez que je n'ose

Parler a vous, ne conter mon martire;

Mais s'il m'esteut le dire a la parclose

Ne me vueilliez, doulce dame, escondire.

10

Car il a ja des ans bien près de six

Que j'ay en vous m'amour toute assenée,

N'oncques n'osay vous requerir mercis

Pour la paour que ne soiez tanee

De m'escouter, mais ne puis plus journee

15

La douleur qui est enclose

Dedens mon cuer endurer sanz le dire;

Mais se voyez que pour vous ne repose,

Ne me vueilliez, doulce dame, escondire.

Gentil cuer doulz, or soient adoulcis

20

Par vous mes maulz, et ma douleur sanée.

Car de plorer et plaindre je m'occis,

Ne je ne puis sanz mort passer l'année,

Se ma douleur n'est brief par vous finée.

Belle, plus fresche que rose,

25

Vo doulce amour demand que tant desire

Et quant ne vueil ne requier autre chose,

Ne me vueilliez, doulce dame, escondire.

Balade LXVI

Mon chevalier, mon gracieux servant,

Je sçay de vray que de bon cuer m'amez,

Et de long temps je vois apercevant

L'amoureux mal dont tant vous vous blamez.

5

Or ne faites plus mate chiere,

Ne vous doulez plus ne jour ne demi,

Car je vous vueil amer d'amour entiere,

Et vous retien pour mon loial ami.

Et la douleur qui tant vous va grevant

10

Pour moye amour, dont pour mort vous clamez,

Je gariray et vous verray souvent.

Ja ne sera mon corps si enfermez

Que je ne treuve bien maniere

De vous veoir; or soiez tout a mi,

15

Car estre vieil aussi vo dame chiere,

Et vous retien pour mon loial ami.

Si gardez bien, ne m'alez decevant,

Car les loyaulz amans sont clersemez;

Ce croy je bien, mals n'alez ensuivant

20

Les faulz mauvais qui tant sont diffamez.

Pour ce, se je ne vous suis fiere,

Et ay pitié dont tant avez gemi

Par quoy ottroy m'amour a vo priere,

Et vous retien pour mon loial ami.

Balade LXVII

Chiere dame, certes je ne pourroie

Vous mercier assez souffisamment

Du noble don que vo doulz cuer envoie

A moy, qui suis vostre serf ligement,

5

De me donner l'amour entierement

De vous que j'aim et desir a servir;

Hé Dieux me doint pouoir du desservir!

Or avez vous remply de toute joye

Mon povre cuer, et osté je tourment

10

Que par long temps pour vous souffert avoye;

Or m'avez vous mercy trop grandement.

Pensé avez de mon avancement

De moy vouloir de tous biens assouvir;

Hé Dieux me doint pouoir du desservir!

15

Or seray gay trop plus que ne souloie,

Et bien est drois que vive liement;

Car tant me plaist que vostre amour soit moye

Que, se le monde estoit mien quittement,

Mieulz vouldroie je perdre entierement

20

Que vostre amour, ou me vueil asservir;

Hé Dieux me doint pouoir du desservir!

Balade LXVIII

Dame, oncques mais je ne vous vi

Que maintenant; mais, sanz mentir,

Mon cuer avez du tout ravi

A tousjours mais, sanz departir.

5

Si me fauldra mains maulz sentir,

Se m'escondissiez; ce vous pry.

Dame, pour Dieu, mercy vous cry.

Grandement m'arez assouvi,

S'il vous plaist a moy consentir

10

Vostre amour, et je vous plevi

Que tout vostre, sanz alentir,

Suis et seray, n'en quier partir.

A jointes mains je vous depry;

Dame, pour Dieu, mercy vous cry.

15

Durement m'ara asservi,

Vostre beaulté qui amatir

Fera mes ris, et assouvi

Sera mon bien; se assentir

Voulez ma mort, comme martir

20

Me mourray; si oyez mon cry:

Dame, pour Dieu, mercy vous cry.

Balade LXIX

Il vous est bien pris en sursault

Le mal d'amours qui si vous blece;

Ne voulez pas avoir deffault

Pour avoir de prier paresce.

5

Je ne suis pas d'amer maistresse,

Et nyce on me devroit clamer,

Sire, de si tost vous amer.

Car il m'est vis que dame fault

Contre honneur et contre noblece,

10

De tost donner ce que tant vault,

Qu'il n'est nulle plus grant richece

Aux desirans, ne tel leesce.

On vous lairoit pou affamer,

Sire, de si tost vous amer.

15

Et desservir avant vous fault

Les biens d'amours a grant destrece,

Et souffrir le froit et le chault,

Que vous en aiez tel largece;

Bien me tendriez a musarresse,

20

Vous meismes me devriez blasmer,

Sire, de si tost vous amer.

Balade LXX

Voulez vous donc que je muire,

Trés belle, pour vous amer?

Helas! ou pourray je fuire,

Se vo doulz cuer m'est amer?

5

Je ne me pourroye armer

Contre amours qui si m'assault

Que vigueur et cuer me fault.

Pour Dieu ne me vueilliez nuire,

Trés doulce estoille de mer

10

Par qui je me vueil conduire

Vous seule vueil reclamer,

Vueillez moy ami clamer,

Ou je vous diray tout hault

Que vigour et cuer me fault.

15

A vo vouloir me vueil duire.

Et de tous poins confermer;

Autre ne me puet deduire.

Si m'i fault du tout fermer,

Sanz nul jour me deffermer

20

De vous, dont j'ay tel deffault

Que vigour et cuer me fault.