L'Avision de Christine

La tierce partie

__________________________________________________

XXVIII

Respont Christine a Philosophie et la remercie

en la personne de Theologie

Adonc se tut la dame honnouree et ie commencay a ainsi dire. O tres souveraine amenistrarece de la pasture et du restorant medicinable qui ne garist pas tant seulement/ le malade par tribulacion navre mais lui rent vie force et vigueur par le doulz oinguement et liqueur de ton reconfort toy philosophie larmoire et corps de toutes sciences lesquelles sont tes membres. Je appercois quil est vray ce qui est dit de toy. Sicomme saint augustin recite/ car tu es toutes sciences et a tes amez te demonstres telle quil te plaist selon la voie quilz te veulent enquerre/ et a moy simple de ta digne grace tes monstre en fourme de saintte theologie pour repaistre mon ignorant corage le plus sainement a mon salut. ne mas pas fait comme a ta chamberiere/ mais mieulx que tu ne promis. Cest assavoir moy servie de tes plus proffitables et dignes mez qui vienent de la table de dieu le pere/ dont te mercy. Cest assavoir dieu qui est toy plus que ne saroye dire/ et vrayement es tu toutes les sciences. Car tu es vraye phisique Cest assavoir theologie en tant que tu es de dieu/ Car toutes les causes de toute nature sont en dieu createur Tu es ethiques. car bonne vie et honneste que tu formes et aprens cest assavoir a amer ce qui est a amer cest dieu et le prochain/ et cela toy theologie monstres tu en la science de phisique/ et de ethiques/ Tu es logique car la lumiere et la verite de lame raisonnable tu demonstres Tu es politique car tu aprens a bien vivre. Car nulle cite nest mieulx gardee que par le fondement et liam de foy et de ferme concorde a amer le bien commun qui est tres vray et tres souverain. Cest dieu de qui tu parles en la science en quoy a moy tes demonstree Cest assavoir theologie. O theologie que ie vueil louer dame en toy souveraine philosophie. Je cognois que quant homme aprent hors de toy se il lui est nuisible par toy il en scet la verite/ Se il lui est proffitable aussi tu lui demonstres et quanque il ara peu aprendre ailleurs se en toy ne reffiert tout sera perte de temps et ignorance/ Car tu es la sapience vraye ne autre nest que toy en qui est trouve ce que ailleurs ne peut estre cest vraye felicite/ Et ce tesmoigne de toy saint gregoire ou prologue du livre de morales que tu as en publique ce de quoy tu puez nourrir les petiz/ et de ce lexperience en ma personne le me tesmoigne/ Et gardes en ton secret ce dont tu puez prendre les haulx entendemens en grant admiracion. Car tu es ainsi comme un fleuve qui semble estre si pou parfont que un aignel y prent pie/ Et si est parfont que un elephant y puet nagier merveilleux est ton fleuve sainte theologie qui si pou semble estre perfont a un aignel Cest a entendre a un bon simple qui y prent pie/ Et si est si perfont a un elephant orgueilleux. Cest aux plus haulz entendemens qui a peine te scevent/ et non toute comprendre

Et pour ce dist bien le benoit saint Jeroisme en lepitre a sa bonne devote la vierge democriade/ use dist il de la lecon de theologie en lieu de mirouer pour corrigier ce que tu as en toy lait et pour garder ce que tu en toy bel/ et te faire plus belle. Car toy saintte theologie as un mirouer qui monstre les ordures et les aprent a nettoyer

De toy et a ta louenge de rechief/ dist le benoit docteur saint Jerousme qui tant chierement tama que ainsi comme les tenebres de la nuyt point nobscurcissent la clarte des estoilles du ciel Ainsi nulle mondaine iniquite ne puet obscurcir les ames qui sont appuyees ou firmament de sainte theologie

O dame saintte theologie tu mas donne certainete de ce que dist de toy se benoit saint gregoire ton docteur ou premier livre de morales que ta doctrine et sainte escripture aucune fois nous est viande/ aucune fois buvrage/ en lieux plus obscurs lors est ce que nous est viande/ quant nous lexposons/ cest la viande que nous maschons/ et quant nous lentendons cest ainsi comme la viande quant nous avalons/ mais es lieux ou elle est plus clere elle nous est buvrage. Car quant elle na besoing de exposicion nous la humons ainsi comme nous la trouvons

Dame que puis ie dire de toy et du bien que tu mas fait de la saintte viande de ton repast qui ma rassadiee/ et fait cognoistre lignorance de ma descognoiscence par quoy ie cognois mon tort par ce que tu mas conclus si dis que toy saintte theologie et divinite es une tres grasse viande qui contiens en toy toutes delices ainsi comme la manne qui aux Juifs plovoit du ciel qui assavouroit en la bouche de chascun selon sa voulente.

Ainsi me depars de mon advision/ laquelle ie ay partie sicomme en .iii. differences de .iii. pierres precieuses en leurs propprietez/ la premiere est en forme de dyamant lequel est dur et poingnant/ et tout soit il cler hors oeuvre quant il est relie et mis en lor il semble estre obscur et brun et toutefois ne rement sa vertu qui est moult grande/ la seconde est le kamayeu en qui pluseurs visages et figures diverses sont empraintes/ et est son siege brun et lemprainte est blanche/ la tierce au rubis precieux cler et resplandissant et sans nue obscure qui a propriete de tant plus plaire comme plus on le regarde

Explicit le livre de ladvision

de Christine