L'Avision de Christine

La tierce partie

__________________________________________________

XIV

Encore de ce mesme

Encore reste a parler de ma plus grant perte a cause de grant prince mort puis le temps du sus dit sage roy charles. Ne fut ce pas voirement evident signe de hayneuse envie de la perverse contre moy quant tost apres que le tres venerable haut et poissant noble prince philippe duc de bourgoigne qui frere fut au dit sage roy mot par la acointance de mes ditz livres et volumes prise a amour/ les quieulx ne lui avoye encore pou de temps a presentez comme ie ne les reputasse dines de estre ouvers en la presence de sa sagece/ Mais comme sa benigne clemence plus considerant ie croy la coustance de mon labour que grant soubtillete estre en mon oeuvre comme elle ny soit moult les eut agreables/ Sicomme me apparu par la louenge de sa parole/ et plus par le effect de son bon et grant secours a lestat non de moy seulement mais de mon dit filz de lui retenu a gages et bien ame serviteur/ Et moy semblablement a qui avec les autres biens fais tant daigna reputer mon savoir/ que il de sa bouche me chargia que ie tins a grant grace/ comme il desirast que la belle vie et notables fais du sage roy susdit fust en propre volume mise en registre adfin que perpetuele memoire demourast/ au monde par bon exempble de son noble nom que ie compillasse des dittes choses certain volume

helas et tost apres lors que sa grace vers moy de plus en plus croiscoit le me tolli par mort la desloiale. la quelle mort fu renouvelement des navreures de mes adversitez et semblablement grief perte a cestui royaume sicomme ou dit livre que il me commanda non encore lors acheve je recorde en piteux regrais.