L'Avision de Christine

La seconde partie

__________________________________________________

XIII

Cesse a parler

des oppinions

Plus te diroye assez quele ie fus es anciens philosophes en divers cas/ et meisme en cestui dessus dit plus largement/ et aussi des solucions du vray distingueur et sage determineur aristote Et qui plus de ce vouldra savoir quiere le philosophe en sa methaphisique. Mais comme la matiere soit obscure de ce/ a tant souffise/ Et ainsi comme en une riche mercerie ou tresor sont avec perles diverses pierres precieuses de pluseurs vertus couleurs et pris lesquelles au goust et plaisance de divers barguigneurs sont requises soient ycestes choses ou tresor de ton volume reservees aux hommes scienceus de soubtil entendement/ Et passent oultre les moins expers aux choses plus legieres et communes/ et tres ore soit changie lordre de notre rethorique en plus vulgare et elegant parleure/ en retournant a nostre premiere arrenge/ Te soyent assez souffisantes les preuves des choses devant dittes me tenant quitte de promesse a toy par moy faitte. Cest assavoir de te declairier les termes de ma poissance manifestes meismement es hommes plus sages et des plus soubtilz engins.