L'Avision de Christine

La seconde partie

__________________________________________________

II

Ci dit de quoy

ces ombres servoient

Dycelles tourbes dombres qui par lair vouloient ie veoie tous environnez les clers disputans es dittes escoles/ et avant que cellui qui vouloit proposer sa question parlast. une de ses ombres lui venoit sacouter a loreille comme selle lui conseillast ce quil devoit dire/ Et apres quant lautre vouloit respondre ou repliquier une autre ombre lui aloit semblament sacouter. et ainsi ny avoit la nul arguant qui neust au tour de son chief. ou une ou .ii. ou .iii. ou quatre ou plus grant quantite qui toutes le conseilloient. Mais chascune science apart avoit sa coulour dombres/ si comme gramaire les verdes/ dyaletique les morees. Arismetique dyaprees. musique blanches/ geometrie vermeilles astrologie les azures. theologie dorees. philosophie cristallines/ Et ainsi des autres sciences liberaulx et deffendues/ Et ceulz qui arguoient navoient environ eulx tant que duroit la disputoison fors les ombres de la couleur qui apartenoit a la science de leurs argus/ mais non obstant que toutes traissent a une couleur ceulz qui proposoyent plus fort/ taintes ou moins taintes que ceulx qui repliquoyent/ si que nulle fois nestoient sanz difference/ Et sil avenoit que pareilles venissent aux parties qui disputoient adonc estoient les .ii. disputans dacort. si estoit la chose partie en tel maniere quil sembloit que ycelles ombres fussent cause de leurs discors. et debas qui aucune fois tant moulteplioit entre eulx que de telz de chaude cole y avoit faisoient venir de verbis ad verbera *Et pource questrange chose pourroit sembler/ a ceulz qui oyent ou ourront la descripcion de ceste advision en ceste partie laquele les yeulz de mon entendement plus clerement veoient que expliquer ne scay ne descripre que iappelle ycestes choses ombres/ et dis quelles avoient couleurs diverses comme se chose contredisant fust couleur et ombre estre ensemble. si dis que ombres voirement Ce estoient car estranges causes leur donnoient leurs fourmes non mie delles maismes les avoient/ coulourees convenoit que elles fussent autrement point ne fussent. Mais transparans petites et grans si que on veoit par mi aucques toutes estoient fors daucunes si troubles que len ny veoit grain ne goute/ Encore plus car tout ainsi comme elles se dessembloient de couleurs semblablement faisoient de fourmes. Car comme iay dit devant de toutes les fourmes et choses qui pevent estre ymaginees avoient ycelles ombres empraintes. Celles qui appertenoient a philosophie estoient comme fleurs de diverses facons et couleurs. mais tant estoient de grant odeur et beaulte que toutes les escoles en resplendissoient/ si que grant beaulte dyestre estoit/ les autres formes dombre comme de gens de bestes ou daultres choses sestendoient plus dehors les escoles et voloient par tout le monde. Car celles plus apartenoient a oeuvres manuelles et fais que a speculacion et plus estoient attribuees aux gens darmes et ordre de chevalerie et autres ars mecaniques et ouvrables/ de tout ce me sembloit que avoye clere cognoiscence/ Mais sur toute chose mesmerveilloit et fort a comprendre mestoit ce que ie veoie non obstant ces diverses parties domibres qui par tout le monde sespandoient/ que *toutefois nestoit ce que lymage dune toute seule ombre en laquelle toutes se frapoient