L'Avision de Christine

La première partie

__________________________________________________

XVIII

De la punicion

des vices

Escoute aussi de rechief la belle louenge des .iii. damoiselles diffamees qui en lieu de mes .iii. tres amees emprisonnees que tu as veues la en bas mont este pour acompaiggnier baillees/ et avise se resiouir me doy de compagnie de si honteuse famine et toutevoie notes a quelle fin termineront leurs proprietes

De celle meismement que tu veis qui en son giron tenoit la dame armee et quitant mes subgiez et les miens corrompt et soubstrait entens lavision comment en esperit de prophecie la vid le prophete zacharie comme il recite en son livre ou Ve chapitre

une femme dist il veoie ou mislieu assise dune buire emplie dyaue/ et tenoit celle dame une grosse masse de plomb quen sa gueule boutoit/ Et puis . ii. autres femmes je veoie qui avoient *aelles semblables a elles descouffle. ycelles prindrent la ditte buire ou la femme assise estoit. Et entre le ciel et la terre la portoint. Adonc dist il a langel demanday qui celle vision me monstroit ou ses femmes la buire a tout la femme assise en lyaue portoient / et cil me respondi ut edificetur sibi domits in terra sennaar. Ilz la portent dist il pour lui edifier la une maison en la terre de sennaar. Par ceste prophecie est entendue la deshonneste dessus ditte / et toute personne quelle a tiree a sa cordelle/ laquelle en toutes plaisances et delis charnelz est desellargir espandre et laissier couler determinee. Tout ainsi comme les eaues sont fluentes et decourans la masse de plomb laquelle est metal pesant et grief que elle en sa gueule lancoit est entendu la griefte de loffence de dieu/ et la honte vituperable qui tant est ponderant et griefve que fait* commettre la deshonneste a ceulz et celles quelle envelope en ses laceurs. les .ii. femmes qui eles avoient et portoient la ditte femme assise sont .ii. mauvaises habondances qui portent et soustienent en voulente deulx espandre en toutes plaisances et charnelx delis/ celle et les siens/ La premiere femme est a entendre de delices habondance si a . ii. elles comme oisel qui la portent. Cest assavoir gloutonnie qui fors mengier et boire viandes gloutes ne queroit/ lautre ele est paresce qui ne veult que iouer et avoir repos/ La seconde femme est de richeces grant habondance/ si a .ii. autres elles cest assavoir rappine. qui ne veult fors tollir lautrui/ lautre elle est cruaulte qui ne scet avoir de nul compassion/ cestes elles estoient a celles descouffle semblables car ainsi que cil oisel ne vit que de proye rapineuse ainsi a celle mauvaise habondance de richeces communement vient on par extorcions et rapines

Or est descripte ceste perverse deshonneste selon la prophecie zacharie mais la fin quelle en sera quen feront celles qui flouttant es eaues la portent ilz la porteront en la terre de sennaar pour la lui edefier sa maison/ sennaar vault autant a dire comme fetor cest punaisie qui est la honte et confusion ou ycelles la menront/ et en la fin lui edifieront sa maison en labitacion denfer ou a punaisie et perpetuele orreur