L'Avision de Christine

La première partie

__________________________________________________

VIII

Dit la dame couronnee

de ses gestes

Le renom de ma franchise ia espandus en toutes places les gouverneurs de noble, attrace avec leurs enfans me pristrent en bail si fus entregittee entre leurs mains par long temps sanz estrange generacion. o dieux glorieux se ie te comptoye toutes les aventures corues es annees puis la naiscence de mon nom iusques a ore lespace de ta vie a lescouter ne porroit souffire. Et pource en brief te dis que les tuteurs de mon bail assez sesforcerent dacroistre la haultece de mon heritage mais comme ignorance encore les tenist tenebreux. ne scavoient attraire eaue doulce pour pardurable arrousement presenter a mes racinetes et plantes par quoy maint seps de vigne et autres tiges toutes sechees et sanz fruit convint errachier et ou feu gitter. Et ainsi dura celle pestilence tant que le .iiie. filz vint lequel par vertu de sage conseil attray lumiere tellement que les tenebres de celle mortel secheresse furent chacies. par laquelle voye ot*cognoiscence de dois et sourse deaue vive a grant habondance si que lui meismes ia tout perdus et sechiez en fu arrouses et vivifiez. et tant pourchaca par sages maistres que labondance du fleuve vivant rendy ruissiaux sourses et fontaines en si grant quantite que toutes mes plantes en furent arrousees et vivifiees, o noble coultiveur fu ycellui/ car moult il augmenta et percrut la perpetuite de mon heritage. en tel maniere quil fu le premier registre de ma salvable gloire. Es mains de cestui pris grant croissance et plaisant beaulte/ et tant quil me dura fus bien deffendue et si gardee et soustenue que chose quelconques ne remaint senestre.