L'Avision de Christine

La première partie

__________________________________________________

II

Ci dit lordre comment

le dit ymage estoit repeus

Delez le dit ymage avoit assistant une grant ombre coronnee de fourme femmenine comme se fust la semblance dune tres poissant royne naturelment fourmee sanz corps visible ne palpable. Si estoit tant grant quelle obombroit et avironoit tout le corps du devant dit ymage. duquel estoit singulierement deputee et establie estre ladministreresse de sa nourriture/ et estoit tel son office environ soy avoit in*strumens infinis de divers coings et empraintes ainsi comme sont a paris moules a faire gauffres. ou autres outilx semblable Et comme ceste dame neust en soy le vice de parece loccuppoit continuelment neccessaire diligence de divers labours. Car sanz prendre repos elle destrempoit mortier quelle coaguloit ensemble/ En laquelle mixtion mettoit fiel. miel. Plomb. et plume. dycelle matiere emplissoit buires de divers facons lesquelles apres versoit en petite quantite es diz moules que bien estouppoit et seeloit. tout ce fait non dune guise mais en diverses differences mettoit tout cuire et confire en la gueule du dit grant ymaige qui tant estoit lee quelle representoit une grant fournaise chauffee en maniere dattrempees estuves la les laissoit iusques a temps convenable lun plus que lautre selon la difference et la grosseur des outilx apres le temps venu que la sage administreresse savoit le terme de la perfeccion de son oeuvre elle ouvroit la bouche de cel ymage par tel art que elle donnoit lieu de tirer hors les materes assez cuites et les autres laissoit cuire jusques a lacomplissement de leurs iours Adont sailloient hors de ces moules petis corps de divers facons selon les empraintes des instrumens. mais merveilleuse aventure en avenoit. Car aussi tost que ces petiz ymages laissoient leurs moules adonc le grant ymage en quel gueule avoient este cuis les transgloutissoit tous vifs en sa pance sanz nombre a une goulee. Et ainsi nuit et iour ne cessoit cel ouvrage continue par les mains dycelle dame pour la pasture du grant corps insaciable