Theséus de Cologne

_________________________________________________________

Laisse III

Moult fut dolent le Roy quant y l'ouyt compter

Que Dieu lui a voulu tel enfent envoyer,

Non pour tant dist aux dames: «Laisser ce parler

80

Puis qu'ainsi plaist a Dieu ne le puis admender.

Y le me fault souffrir; je Le doy aorer.»

Ne sçais que vous yroie la chose delayer –

On le fist baptiser sans y (la) plus arrester,

Thezéus ot a nom quant ce vint au nommer,

85

Car l'arcevesque lui fist le nom de lui porter.

Onques le Roy ne volt l'enfent lors regarder;

Mais avant que l'enfent dont m'oyez cy parler

Fut en aage d'omme, le fist Dieu figurer

Tellement et si bel que on n'eust peu trouver

90

Nul plus bel de son corps en terre ne en mer,

Ainsi que vous pourrés ouyr [et] escouter.

Or diray de son pere au cuer gay

Qui fist lors de sa femme songneusement garder

Et l'aloyt moult souvent doucement visiter,

95

Mais la dame ne pot celle chose oublier,

Tous les jours lui aloyt souvenir du parler

De l'enfent a la femme dont elle ala blamer;

Sy en print envers Dieu mercie a demander

Et par contricion par fait et par parler.

L. f.2b

Et l'enfent devainct grant qu'on faisoit gouverner;

Mais tant fut contreffait qu'i ne pouoit admender,

Non pour tant en grant cens s'ala si doctriner

Que nul ne le pouoit en science passer.

Et l'escripture aprint et bien s'i volt fonder

105

Qu'i n'estoit nul vivant qui le peust mater.

Thezéus fut bien duit, bien sot parlemanter

Et au moustier aussi savoit Dieu aorer,

Que tous ceulx de Couloingne et les clers et les pers

Sy prindrent de l'enfent la doctrine a louer,

110

Et disoient que fut dommage: que Dieu l'a fait former

En ytelle manière et ung tel corps donner.

Et les aultres disoient: «Ne le peut admender,

Nul n'est parfait que Dieu, la n'y a que rymer;

Et vault mieulx que Dieu l'ayt fait entrer

115

En cens et en valeur pour tous vyces blamer

Qu'estre en beaulté parffait et tous maulx eslever.»