La vie de Jaufré Rudel

Texte:

Les Biographies Des Troubadours en Langue Provencale

Éd.: Camille Chabaneau, Paris: Slatkine, 1975

____________________________________________________________________________

Vida

Jaufres Rudels de Blaia si fo molt gentils hom, princes de Blaia. Et enamoret se de la comtessa de Tripol ses vezer per lo gran ben e per la gran cortesia q'el auzi dir de lieis als pelegris que vengron d'Antiochia. E fetz de lieis mains bons vers et ab bons sons ab paubres motz. E per voluntat de lieis vezer, el se crozet e mes se en mar per anar lieis vezer. Et adoncs en la nau lo pres mout grans malautia, si que cill qui eron ab lui cuideron qe el fos mortz en la nau. Mas tant ferron qe ill lo conduisseron a Tripol en un alberc cum per mort. E fo faich a saber a la comtessa, e venc ad el al sieu lieich e pres lo entre sos bratz. Et el saup q'ella era la comtessa, si recobret lo vezer e·l flazar. E lauzet Dieu e·l grazi qe·ill avia la vida sostenguda tro q'el l'ages vista. E enaissi el moric entre·ls braz de la comtessa. Et ella lo fetz honradamenz sepeillir en la maison del Temple de Tripol. E pois en aqel meteus dia ela se rendet monga per la dolor qe ella ac de lui e de la soa mort. Et aqui son escriutas de las soas chanssos.