Quan lo rius de la fontana

Texte:

The Songs of Jaufré Rudel

Éd.: Rupert T. Pickens, Toronto 1978

(Rudelian Corpus in MS. C)

____________________________________________________________________________

I

Quan lo rius de la fontana

S'esclarzis si cum far sol,

E par la flors aiglentina,

El rossinholet el ram

5

Volt e refranh ez aplana

Son dous chantar e·l afina,

Be·ys dregz qu'ieu la mieu refranha.

II

Amor de terra lonhdana,

Per vos tot lo cor mi dol,

10

E no·n puesc trobar mezina

Si non al vostre reclam

Ab maltrait d'amor doussana

Dins uergier o part cortina

Ab dezirada companha.

III

15

Pus tot iorn me·n falh aizina.

No·m meravilh si·n ai fam,

Quar anc genser crestïana

No fo ni Dieus non o uol,

Juzïa ni Sarrazina.

20

Ben es selh paguatz de mana

Qui de s'amor ren guazanha.

IV

De dezir mos cors no fina

Vas selha res qu'ieu pus am,

E cre que·l voler m'enguana

25

Si cobezeza la·m tol,

Que pus es ponhens d'espina

La dolors que per joy sana,

Don ja no vuelh qu'om me·n planha.

V

Quan pensar me·n fai aizina,

30

A doncs la bays e l'acol,

Mas pueys torn en revolina.

Per que·m n'espert e·n aflam,

Quar so que floris no·n grana:

Lo joy que mi n'atayna

35

Tot mos cujatz afaitanha.

VI

Senes breu de pargamina

Tramet lo vers en cantan

En plana lengua romana

An Ugo Bru per filhol:

40

Bo·m sap, quar gent peitavina,

De Berri o de Bretanha,

S'esiau per lieys e·n guizana.