Vita

_________________________________________________________

Vita.

Natus sum Rudolphus Ludovicus Carolus Virchow anno MDCCCXXI die XIII. Octobris Schivelbeini, oppido Pomeraniae Neomarchio, quo pater Carolus mercator, mater Ioanna e gente Hesse adhuc exoptata vita fruuntur. Fidei evangelicae addictus. Privata eruditione cultus per quatuor annos gymnasium frequentavi, quod auspiciis Cl. Mueller Coeslini floret. Quo cum testimonio maturitatis m. Martio anni MDCCCXXXIX relicto, per semestris aestivum domi commoratus, m. Octobri Berolinum petivi, institutum Friderico-Guilelmianum medico-chirurgicum aditurus. Tunc disserentes audivi per quadriennium:

Cel. Beneke de logice et psychologia; Cel. Turte de physice; Ill. Link de botanice et historia naturali; Ill. B. Mitscherlich de chymia organica et anorganica; Cel. Preuss de historia; Ill. Rückert de poetis arabicis; Ill. Schlemm de osteologia, splanchnologia et syndesmologia; Ill. Mueller de anatome universa, pathologia et comparata, nec non de physiologia.

Medicas hasce scholas frequentavi: Ill. Mitscherlich de materia medica; Beat. Osann de fontibus medicatis; Cel. Eck de physiologia, therapia generali et semiotice; Ill. Horn de morbis syphiliticis et psychicis; Ill. Casper de formulis medicis et medicina forensi; Ill. Schoenlein de pathologia et therapia speciali; Ill. Hecker de encyclopaedia medica, de pathologia generali et historia medicinae; Cel. Kluge de desmologia, de ossibus fractis et luxatis, de chirurgia generali, de arte obstetricia et akurgia; Cel. Froriep de akurgia; Ill. Juengken de chirurgia speciali; Ill. Wagner de politia medica.

Duces mihi fuere in arte secandi Ill. Mueller et Ill. Schlemm, in operationibus chirurgicis Cel. Froriep et ophthalmiatricis Cel. Augelstein, in exercitationibus clinicis viri Illustrissimi et Celeberrimi Wolff, Schoenstein, Dieffenbach, Juengken, Kluge.

Quibus viris spectatissimis omnibus gratias ago quam maximas semperque habebo.

Jam vero tentaminibus, tam philosophico quam medico, nec non examine rigoroso rite superatis, spero fore, ut dissertatione thesibusque publice defensis, summi in chirurgia et medicina honores mihi tribuantur.