Vir nemoris

Liber II

___________________________________________________

ingens incumbit fulcro textumque recondit.

510

Pacto etenim indicto, sub limite temporis urbes

copia parua tenet, Ligurum sub nomine, casum

queis leuat extremum et sistit uictoribus arma.

Quin alios paruo rex pellicit agmine reges

(discite uos tandem tali non fidere regi!)

515

hinc medius fingit rixas componere iudex.

Vtraque uota diu mentemque uolutat utramque

subdolus et sensus amborum perlegit imos.

Inde parat proprium riuos deflectere in amnem.

Aulicus infamis, qui nunc iacet exsul ab aula,

520

cuius non patitur nomen uel musa uel auris,

consilium in summis regni tum rebus habebat.

Hunc dudum peregre famulatu plurima passum

et lenocinia et ueneris blandita potentis

munera et illecrebrae, fraus et delatio mendax

525

regis apud solium regnique in summa locarunt.

Indolis hic natu primisque instructus ab annis

abdere consilium uultu simulataque turpi

uerba aptare dolo, uersutae dissona menti,

quod ui et fraude potest, id factum iure putabat.

[20]

530

Debellare inopes, astu captare potentes,

abiurare fidem firmataque pacta procaci

fronte nihil fecit, quin regni credidit artem.

Defuit huic numquam fraudumque minister Vlysses.

perfidiorque si non, socios in fraude uocauit.

535

Quis mihi nunc missae commercia perfida chartae

explicet, unde lupum, uulgata ut fabula narrat,

captantem uideas in margine fluminis agnum?

Saepe oblata Duci, patriam si uenderet auro,

munera quis memoret praeclaraque munia in armis?

[125 ^r]

540

Vnde reluctanti mens indignata repente

infremuit pectusque furor percussit honestum.

Quis ducis insidias uestri nexusque plicatos

inter amicitiae sanctum inuiolabile nomen

congressusque dator fraudemque tegentia dulci

545

mellea uerba sono nec non conuiuia multis

comiter acta locis et cetera dicere posset?

――――――

124^v, 510 pacto correxi: pacta T V // 526 nutu err. T V // 533 minester err. V.