Verses from Milton's

Commonplace Book

1625

Textus:

John Milton, Complete Poems and Major Prose

ed. Merritt Y. Hughes, New York: The Odyssey Press 1957

______________________________________________________________________________

Carmina Elegiaca

SURGE, age, surge, leves, iam convenit, excute somnos,

Lux oritur; tepidi fulcra relinque tori.

Iam canit excubitor gallus, praenuntius ales

Solis, et invigilans ad sua quemque vocat.

5

Flammiger Eois Titan caput exerit undis,

Et spargit nitidum laeta per arva iubar.

Daulias argutum modulatur ab ilice carmen

Edit et excultos mitis alauda modos.

Iam rosa fragrantes spirat siluestris odores;

10

Iam redolent violae luxuriatque seges.

Ecce novo campos Zephyritis gramine vestit

Fertilis, et vitreo rore madescit humus.

Segnes invenias molli vix talia lecto,

Cum premat imbellis lumina fessa sopor.

15

Illic languentes abrumpunt somnia somnos,

Et turbant animum tristia multa tuum.

Illic tabifici generantur semina morbi.

Qui pote torpentem posse valere virum?

Surge, age, surge, leves, iam convenit, excute somnos,

20

Lux oritur; tepidi fulcra relinque tori.

Versus Asclepiadeus:

IGNAVUS satrapam dedecet inclytum

Somnus qui populo multifido praeest.

Dum Dauni veteris filius armiger

Stratus purpureo procubuit toro.

5

Audax Eurialus, Nisus et impiger

Invasere cati nocte sub horrida

Torpentes Rutilos castraque Volscia:

Hinc caedes oritur clamor et absonus.

. . . . . . . . . . . . . . . . . . . . . . . . . . .