De imitatione Christi

Liber internae

consolationis.

[Liber III]

____________________________________________________________

QVALITER INSTANTE

TRIBVLATIONE DEVS INVOCANDVS

EST ET BENEDICENDVS.

CAPITVLVM  XXIX.

Sit nomen tuum Domine benedictum in saecula: qui voluisti hanc temptationem et tribulationem venire super me. Non possum eam effugere; sed necesse habeo ad te confugere: ut me adiuves et in bonum mihi convertas. Domine, modo sum in tribulatione; et non est cordi meo bene: sed multum vexor a praesenti passione. Et nunc Pater dilecte quid dicam? Deprehensus sum inter angustias. Salvifica me ex hora hac. Sed propterea veni in hanc horam, ut tu clarificeris: cum fuero valide humiliatus et per te liberatus. Complaceat tibi Domine ut eruas me: nam ego pauper quid agere possum; et quo ibo sine te? Da patientiam Domine: etiam hac vice. Adiuva me Deus meus: et non timebo quantumcumque gravatus fuero. Et nunc inter haec quid dicam? Domine fiat voluntas tua: ego bene merui tribulari et gravari. Oportet utique ut sustineam; et utinam patienter: donec transeat tempestas et melius fiat. Potens est autem omnipotens manus tua etiam hanc temptationem a me auferre; et eius impetum mitigare ne penitus succumbam: quemadmodum et prius saepius egisti me cum Deus meus misericordia mea. Et quanto mihi difficilius: tanto tibi facilior est haec mutatio dexterae Excelsi.