| |
|
- C a r m e n s a e c u l a r e .
Textus:
Conradi Celtis quae Vindobonae prelo
subicienda curavit opuscula
ed. Kurt Adel, Leipzig 1966
- _______________________________________________
- Incipit Carmen Saeculare
cuius versus numeru(m) horar(um)
diurnae revolut(i)onis caeli co(n)tinent
et o(mn)es sphaeras caelestes.
(O)rbe centeno modo solis axis
Currit aetatem renovare pergens
Saeculi nostri. pueri et puellae,
Dicite carmen!
- 5
- Terra, quae cincta es socio liquore,
Aer ac undis inimicus ignis,
Pace co(n)cordes alimenta nobis
Largiter aedas.
Luna, fecunda(n)s uteros pudicos,
- 10
- Nutrias fetus, subolem et venustam
Auge et humorem vegetesque cuncta
Semina rerum.
Quique contectus vafer es galero,
Aliger, linguas doceas et artes
- 15
- Et lyram nostras fidibus canoris
Infer ad oras.
Quaeque nos blando stimulas calore,
Mater aeterni et genitrix Amoris,
Copula laetis maribus maritas
- 20
- Prole perenni.
Tuque, qui vultu es rutilus corusco,
Lucis et noctis sator atque rector,
Phoebe, Germanas radios benignos
Sparge per oras.
- 25
- Marsque, qui longa galeatus hasta es
Et comis fulvis volitas per orbem,
Ense Germanas tueare terras
Fasque piumque.
Iuppiter, totus duce quo stat orbis,
- 30
- Maximu(m) serves, rogo, Aemilianu(m),
Qui tuas terras regit, ut tuo tu
Numine caelum.
Tuque, qui curvam geris orbe falcem,
Conde morbosas, petimus, sagittas,
- 35
- Rusticas artes doceas bovesque
Sub iuga mittas.
Hinc gregis princeps, Aries, per arva
Umidos veris referens tepores,
Prospera fetus oviu(m) et bidentum
- 40
- Corpora cures.
Quique nos largis dapibus repascis
Findis et latos, oculose, campos,
Taure, lascivum butyru(m) datoque
Lactea dona.
- 45
- Vosque, qui iunctis manibus nitetis,
Castor et Pollux, equus arte quorum
Frena suscepit, date vestro equina(m)
Sidere prolem.
Corticem rubrum tua, Carcinus, qui
- 50
- Terga deformas tropicas habenas
Cynthii vertens, niteas, precamur,
Lumine fausto.
Tuque, qui fulvis aperis calentes
Rictibus fauces Cane cum gemello,
- 55
- Parce Germanas, petimus, calore ex-
Urere terras.
Quaeque splendens spicifera corona,
Virgo, maturas comitata messes,
Frugibus multis spatiosa nobis
- 60
- Horrea dites.
Libra, quae noctes pariles diesque
Lancibus aequis facis et repensas,
Profer Autumni caput et Lyaei
Pocula fundas.
- 65
- Tuque cum cauda truculentus unca
Mordicus spargens tetricum venenum,
Pestiles morbos Alemannis aufer,
Poscimus, oris.
Quique pennatas, semivir, sagittas
- 70
- Tendis et curvo minitaris arcu,
Tela de nostris, precor, aufer oris
Et fera bella.
Quique stas barba rigidus nivosa et
Vertis hibernos glaciosus ortus,
- 75
- Fulgidu(m) Phoebu(m) refer Alemannas
Prosper ad oras.
Tuque, qui flexa rutilas in Urna,
Da salutares, petimus, liquores
Irrigans agros, et amoena scissis
- 80
- Flumina ripis.
Vosque, qui squamis pariter nitetis,
Ultima obliqui vaga signa caeli,
Poscimus, vestro date copiosos
Sidere pisces.
- 85
- Vosque, qui iuxta, radiosa turba,
Circulum obliquu(m) per utrumque caelu(m)
Curritis, vestris radiis amica in-
Fundite fata.
Tuque, quo constant vagabunda caeli
- 90
- Sidera et quicquid spatiosus orbis
Continet, nostris precibus benignas
Des, precor, aures;
Nos tuum nomen fugit et potestas;
Quisquis es, curas habeas benignas
- 95
- Rebus Almanis! tibi multa fumant
Templa per urbes.
Haec ego in Austriaca ca(n)tavi carmi(n)a terra,
Alpica q(uae) Styrius tectaque Carnus h(ab)et.
|
|