Gesta Romanorum

Textus:

Gesta Romanorum

ed. H. Oesterley, Berlin 1872

________________________________________________________________

CCXXVIII.

 

Dicitur quod inter philomelam et buphonem sit odium naturale in cantu, ideo quia philomena de nocte dum dulciter cantat tunc bupho nititur ipsam in predam capere et ei fortiter insidiatur, ut eam interficiat. Quod intelligens phylomela rubum vel spinam densissimam intrat et ita se a buphonis insidiis cnstodit et conservat.

Ad propositum. Per phylomenam anima fidelis intelligitur que creata est ut deum suum per jugem contemplationem et devotionem laudet Sed anime sic deum laudanti insidiatur bupho i. e. dyabolus qui in locis obschuris latet i. e. in inferno et ejus habitatio est in cordibus peccatorum, ut eos absorbeat. Tunc anima ne ab ipso capiatur intrat rubum i. e. asperam vitam penitencie, ut evadere possit insidias et laqueos dyaboli.