Legenda aurea

1263 - 1273

________________________________________________________________

Incipit prologus super legenda sanctorum.

Alias Lombardica hystoria, quam compilavit

frater Jacobus natione Januensis,

ordinis fratrum praedicatorum.

Universum tempus praesentis vitae in quatuor distinguitur, scilicet in tempus deviationis, renovationis sive revocationis, reconciliationis et peregrinationis. Tempus deviationis fuit ab Adam, postquam scilicet a Deo deviavit, et duravit usque ad Moysen et istud tempns repraesentat ecclesia a septuagesiina usque ad Pascha. Unde et tunc legitur Genesis liber, scilicet in quo ponitur de-viatio primoruin parentum. Tempus renovationis sive revocationis incepit a Moyse et duravit usque ad nativitatem Christi. In quo homines per prophetas ad fidem revocati sunt et renovati. Et istud tempus repraesentat ecclesia ab adventu Domini usque ad nativitatem Christi. Unde tunc legitur Ysaias, ubi de hac revocatione aperte agitur. Tempus reconciliationis est tempus, in quo per Christum sumus reconciliati. Et istud tempus repraesentat ecclesia a Pascha usque ad Penthecosten. Unde et tunc legitur Apocalypsis, ubi plene agitur de mysterio hujus reconciliationis. Tempus peregrinationis est tempus praesentis vitae, in quo peregrinamur et in pugna semper sumus. Et illud tempus repraesentat ecclesia ab octava penthecosten usque ad adventum Domini. Unde tunc leguntur libri Regum et Machabeorum, in quibus de multiplici pugna agitur, per quam nostra pugna spiritualis signatur. Tempus autem illud, quod est a natali Domini usque ad septuagesimam, partim continetur sub tempore reconciliationis, quod est tempus laetitiae, scilicet a natali usque ad octavam epyphaniae et usque ad septuagesimam. Et potest accipi hic quadrupliciter temporum narratio. Primo penes quatuor temporum distinctiones, ut hiems referatur ad primum: ver ad secundum: aestas ad tertium: autumnus ad quartum. Et ratio appropinquationis satis patet. Secundo penes quatuor partes diei, ut nox referatur ad primum: mane ad secundum: meridies ad tertium: vespera ad quartum. Licet autem prius fuerit deviatio quam renovatio, tamen ecclesia omnia sua potius incipit in tempore renovationis quam deviationis, id est in adventu potius quam in septuagesima, et hoc duplici ratione. Primo ne videatur incipere ab errore, tenet enim rem et non sequitur ordinem temporis, sic ut et evangelistae saepius faciunt. Secundo quoniam per adventum Christi omnia renovata sunt; propter quod tempus istud dicitur tempus revocationis Apocal. III: Ecce ego nova facio omnia. Congrue igitur in hoc tempore renovationis ecclesia omnia officia sua renovat. Ut igitur ordo temporis ab ecclesia distinctus servetur, primo agemus de festivitatibus, quae occurrunt infra tempus renovationis, quod tempus repraesentat ecclesia ab adventu usque ad nativitatem domini. Secundo de illis quae occurrunt infra tempus quod partim continetur sub tempore reconciliationis partim sub tempore peregrinationis, quod tempus repraesentat ecclesia ab adventu usque ad septuagesimam. Tertio de illis quae occurrunt infra tempus deviationis, quod tempus repraesentat ecclesia a septuagesima usque ad Pascha. Quarto de illis, quae occurrunt infra tempus reconciliationis quod tempus repraesentat ecclesia a pascha usque ad octavam penthecosten. Quinto de illis quae occurrunt infra tempus peregrinationis, quod tempus repraesentat ecclesia ab octava penthecosten usque ad adventum.