Liber Abaci

Capitulum X

________________________________________________________________

[fol. 56r]

Incipit capitulum decimum

de societatibus factis inter consocios.

――――――

CUM autem prepositum fuerit de quibusdam consociis qui insimul societatem fecerunt, quorum unusquisque inequaliter suam portionem in ipsa societate habuerit, et cum ipsa societate aliquam quantitatem lucrati fuerint; quam quantitatem inter se secundum portiones eorum dividere voluerint. Et voluerit scire quot unicuique de ipso lucro continget; pone portionem primi socii in capite tabule in dextera parte; deinde in eadem linea versus sinistram portiones aliorum per ordinem ponere studeas; et lucrum quod fecerint, in alio capite tabule in eadem linea depingas, in sinistra videlicet parte. Tunc aggregabis portiones omnium sociorum in unum, et aggregatam summam servabis. In qua singulariter divides multiplicationes portionis uniuscuiusque socii in totum lucrum; et sic habebis hoc quod unicuique de ipso lucro contigerit. Et ut hoc apertius declaretur, primum in societate duorum hominum in prima parte; et trium in secunda; et quattuor in tertia cum variis positionum portionibus demonstrabimus: deinde in quinta parte divisiones quorumdam numerorum in portionibus ruptorum ad modum societatum terminabimus.

[...]