Liber Abaci

Capitulum VI

________________________________________________________________

Incipit capitulum sextum

de multiplicatione integrorum numerorum cum ruptis.

――――――

[fol. 20v] CUM autem quemlibet numerum cuiuslibet gradus cum quolibet rupto vel ruptis per quemlibet numerum cum quolibet rupto vel ruptis multiplicare volueris , describe maiorem numerum cum suo rupto, vel ruptis sub minori numero cum suis minutis , scilicet numerum sub numero, et minuta sub minutis. Et accipe superiorem numerum cum suis minutis. Et fac inde talia minuta qualia sunt illa que sunt cum ipso numero. Et similiter de inferiori facies sua minuta. Et multiplicabis facta minuta superioris numeri per facta minuta inferioris. Et summam divides per minuta utriusque numeri sub una virgula, scilicet coaptata; et habebis cuiuslibet numerorum cum minutis multiplicationes. Et ut hec cum demonstrationibus numerorum intelligibiliter ostendatur.

Hoc capitulum in partes octo dividimus.

Quarum prima erit de multiplicatione numerorum integrorum cum uno rupto sub una virgula.

Secunda de multiplicatione numerorum cum duobus et tribus ruptis sub una virgula.

Tertia de multiplicatione numerorum cum duabus ruptis sub duabus virgulis.

Quarta de multiplicatione numerorum cum duabus virgulis cum pluribus ruptis.

Quinta de multiplicatione numerorum cum tribus virgulis.

Sexta de multiplicatione ruptorum sine sanis.

Septima de multiplicatione numerorum et ruptorum, quorum virge terminantur in circulo.

Octaua de multiplicatione partium numerorum et ruptis.

[...]