Hymnus Sancti Ioannis Baptistae

Textus:

Hymnus Sancti Ioannis Baptistae

in: Ernst Ferdinand Bäßler, Auswahl altchristlicher Lieder

vom zweiten bis funfzehnten Jahrhundert,

im Urtext und in deutschen Übersetzungen

Berlin: R. Decker, 1858

Facsimile: Google

________________________________________________________________

I

UT queant laxis REsonare fibris

MIra gestorum FAmuli tuorum,

SOLve polluti LAbii reatum,

Sancte Ioannes.

II

Nuncius celso veniens olympo,

Te patri magnum fore nasciturum,

Nomen et vitae seriem gerendae

Ordine promit.

III

Ille promissi dubius superni

Perdidit promptae modulos loquelae,

Sed reformasti genitus peremptae

Organa vocis.

IV

Antra deserti teneris sub annis,

Civium turmas fugiens, petisti,

Ne levi saltem maculare vitam

Famine posses.

V

Praebuit hirtum tegimen camelus,

Artubus sacris strophium bidentes,

Cui latex haustum, sociata pastum

Mella locustis.

VI

Caeteri tantum cecinere vatum

Corde praesago iubar adfuturum,

Tu quidem mundi scelus auferentem

Indice prodis.

VII

Non fuit vasti spatium per orbis

Sanctior quisquam genitus Ioanne,

Qui nefas saecli meruit lavantem

Tingere lymphis.

VIII

O nimis felix meritique celsi,

Nesciens labem nivei pudoris,

Praepotens martyr eremique cultor,

Maxime vatum.

IX

Nunc potens nostri meritis opimis

Pectoris duros lapides repelle,

Asperum planans iter, et reflexos

Dirige calles.

X

Ut pius mundi sator et redemptor,

Mentibus pulsa livione puris,

Rite dignetur veniens sacratos

Ponere gressus.

XI

Laudibus cives celebrant superni

Te Deus simplex pariterque trine,

Supplices et nos veniam precamur,

Parce redemptis.