Hymni a Gregorio conscripti

Hymnus V

_________________________________________________________

In Quadragesima. Ad nocturnum.

1.

Clarum decus jejunii

Monstratur orbi coelitus,

Quod Christus auctor omnium

Cibis dicavit abstinens.

2.

Hoc Moyses charus Deo,

Legisque lator factus est,

Hoc Eliam per aera

Curru levavit igneo.

3.

Hinc Daniel mysteria

Victor leonum viderat,

Per hoc amicus intimus

Sponsi Joannes claruit.

4.

Haec nos sequi dona, Deus,

Exempla parcimoniae;

Tu robur auge mentium,

Dans Spiritale gaudium.