| |
|
-
- C a r m i n a
Textus:
Sancti Columbani opera, p. 190 sqq.
(Scriptores Latini Hiberniae, 2)
ed. G. M. S. Walker, Dublin 1957
Versio digitalis:
Juan-José Marcos García
- _____________________________________
- C A R M E N N A V A L E
En silvis caesa fluctu meat acta carina
bicornis Hreni et pelagus perlabitur uncta!
Heia viri! nostrum reboans echo sonet heia!
Extollunt venti flatus, nocet horridus imber,
- 5
- sed vis apta virum superat sternitque procellam.
Heia viri! nostrum reboans echo sonet heia!
Nam caedunt nimbi studio, caeditque procella;
cuncta domat nisus, labor improbus omnia vincit.
Heia viri! nostrum reboans echo sonet heia!
- 10
- Durate et vosmet rebus servate secundis,
o passi graviora; dabit deus his quoque finem.
Heia viri! nostrum reboans echo sonet heia!
Sic inimicus agit invisus corda fatigans
ac male temptando quatit intima corda furore.
- 15
- Vestra, viri, Christum memorans mens personet heia!
State animo fixi hostisque spernite strofas,
virtutum vosmet armis defendite rite!
Vestra, viri, Christum memorans mens personet heia!
Firma fides cuncta superat studiumque beatum,
- 20
- Hostis et antiquus cedens sua spicula frangit.
Vestra, viri, Christum memorans mens personet heia!
Rex quoque virtutum, rerum fons, summa potestas,
certanti spondet, vincenti praemia donat.
Vestra, viri, Christum memorans mens personet heia!
|
|