| |
|
- C a r m e n
d e a v e P h o e n i c e
Editio Jean Hubeaux/Maxime Leroy
Paris 1939
- __________________________________________
Phoenix, catacumba
Sancti Calixti, Romae
- Est locus in primo felix oriente remotus,
Qua patet aeterni maxima porta poli
Nec tamen aestivos hiemisve propinquus ad ortus,
Sed qua sol verno fundit ab axe diem.
- 5
- Illic planities tractus diffundit apertos
Nec tumulus crescit nec cava vallis hiat,
Sed nostros montes quorum iuga celsa putantur,
- 8
- Per bis sex ulnas eminet ille locus.
- 11
- Cum Phaethonteis flagrasset ab ignibus axis,
- 12
- Ille locus flammis inviolatus erat.
- 13
- Et cum diluvium mersisset fluctibus orbem,
- 14
- Deucalioneas exsuperavit aquas.
- 9
- Hic solis nemus est: et consitus arbore multa
- 10
- Lucus perpetuae frondis honore virens.
- 15
- Non huc exsangues morbi, non aegra senectus,
Nec mors crudelis, nec metus asper adit,
Nec scelus infandum nec opum vesana cupido,
Aut Venus aut ardens cedit amore furor;
Luctus acerbus abest et egestas obsita pannis
- 20
- Et curae insomnes et violenta fames.
Non ibi tempestas nec vis furit horrida venti
Nec gelido terram rore pruina tegit,
Nulla super campos tendit sua vellera nubes,
Nec cadit ex alto turbidus umor aquae.
- 25
- Sed fons in medio est, quem vivum nomine dicunt,
Perspicuus, lenis, dulcibus uber aquis,
Qui semel erumpens per singula tempora mensum,
Duodecies undis inrigat omne nemus.
Hic genus arboreum procero stipite surgens
- 30
- Non lapsura solo mitia poma gerit.
Hoc nemus, hos lucos avis incolit unica Phoenix,
Unica, sed vivit morte refecta sua.
Paret et obsequitur Phoebo memoranda satelles:
- 34
- Hoc natura parens munus habere dedit.
- 55
- Atque eadem celeres etiam discriminat horas
Non errabilibus nocte dieque sonis,
Antistes luci nemorumque verenda sacerdos
Et sola arcanis conscia, Phoebe, tuis.
Quae postquam vitae iam mille peregerit annos,
- 60
- Ac sic reddiderint tempora longa gravem,
Ut reparet lapsum spatiis vergentibus aevum,
Adsuetum nemoris dulce cubile fugit.
Cumque renascendi studio loca sancta reliquit,
Tunc petit hunc orbem, mors ubi regna tenet.
- 65
- Dirigit in Syriam celeres longaeva volatus,
Phoenicis nomen cui dedit ipsa vetus.
Decretosque petit deserta per avia lucos,
Sicubi per saltus silva remota latet.
Tum legit aerio sublimem vertice palmam
- 70
- Quae Graium phoenix ex ave nomen habet,
In quam nulla nocens animans prorepere possit,
Lubricus aut serpens aut avis ulla rapax.
Tum ventos claudit pendentibus Aeolus antris,
Ne violent flabris aera purpureum,
- 75
- Neu concreta noto nubes per inania coeli
Submoveat radios solis et obsit avi.
Construit inde sibi seu nidum sive sepulchrum:
Nam perit, ut vivat, se tamen ipsa creat.
Colligit hinc sucos et odores divite silva,
- 80
- Quos legit Assyrius, quos opulentus Arabs,
Quos aut Pygmeae gentes aut India carpit
Aut molli generat terra Sabaea sinu;
Cinnamon hinc auramque procul spirantis amomi
Congerit et mixto balsama cum folio;
- 85
- Non casiae mitis nec olentis vimen acanthi
Nec turis lacrimae guttaque pinguis abest.
His addit teneras nardi pubentis aristas
Et sociam myrrhae vim, panacea, tuam.
Protinus instructo corpus mutabile nido,
- 90
- Vitalique toro membra quieta locat.
- 35
- Lutea cum primum surgens Aurora rubescit,
Cum primum rosea sidera luce fugat,
Ter quater illa pias inmergit corpus in undas,
Ter quater e vivo gurgite libat aquam;
Tollitur ac summo considit in arboris altae
- 40
- Vertice, quae totum despicit una nemus,
Et conversa novos Phoebi nascentis ad ortus,
Expectat radios et iubar exoriens.
Atque ubi Sol pepulit fulgentis limina portae
Et primi emicuit luminis aura levis,
- 45
- Incipit illa sacri modulamina fundere cantus
Et mira lucem voce ciere novam,
Quam nec aedoniae voces nec tibia possit
Musica Cirrhaeis adsimulare modis,
Sed neque olor moriens imitare posse putetur
- 50
- Nec Cylleneae fila canora lyrae.
Postquam Phoebus equos in aperta effudit Olympi,
Atque orbem totum protulit usque means,
Illa ter alarum repetito verbere plaudit
- 54
- Igniferumque caput ter venerata silet.
- 91
- Ore dehinc sucos membris circumque supraque
Inicit exsequiis inmoritura suis.
Tunc inter varios animam commendat odores
Depositi tanti nec timet illa fidem.
- 95
- Interea corpus genitali morte peremptum
Aestuat et flammam parturit ipse calor,
Aetherioque procul de lumine concipit ignem:
Flagrat et ambustum solvitur in cineres,
Quos luteam in massam Natura umore coactos
- 100
- Conflat et effectum seminis instar habet.
Hinc animal primum sine membris fertur oriri,
Sed fetu vermis lacteus esse color.
Crescit et in mensum sopitur tempore certo
- 104
- Seque ovi teretis colligit in speciem.
- 107
- Ac velut agrestes, cum filo ad saxa tenentur,
- 108
- Mutari tineae papilione solent,
- 105
- Inde reformatur qualis fuit ante figura
- 106
- Et Phoenix ruptis pullulat exuviis.
- 109
- Non illi cibus est nostro concessus in orbe
- 110
- Nec cuipiam inplumem pascere cura subest.
Ambrosios libat coelesti nectare rores,
Stellifero tenues qui cecidere polo.
Hos legit, his alitur mediis in odoribus ales,
Donec maturam proferat effigiem.
- 115
- Ast ubi primaeva coepit florere iuventa,
Evolat ad proprias iam reditura domus.
Ante tamen patrio quidquid de corpore restat,
Ossaque vel cineres exuviasque suas
Unguine balsameo myrrhaque et ture soluto
- 120
- Condit et in formam conglobat ore pio.
Quam pedibus gestans contendit solis ad urbem
Inque ara residens ponit in aede sacra.
Mirandam sese praestat praebetque verendam:
Tantus avi decor est, tantus abundat honor.
- 125
- Puniceo colore est quali sub sidere cancri
Mitia quod corium punica grana tegit,
Qualis inest foliis quae fert agreste papaver,
Cum pandit vestes Flora rubente polo.
Hoc humeri pectusque decens velamine fulget,
- 130
- Hoc caput, hoc cervix summaque terga nitent.
Caudaque porrigitur fulvo distincta metallo,
In cuius maculis purpura mixta rubet.
Alarum pennas insignit desuper iris
Pingere ceu nubem desuper aura solet.
- 135
- Albicat insignis mixto viridante zmaragdo
Et puro cornu gemmea cuspis hiat.
Ingentes oculi, credas geminos hyacinthos,
Quorum de medio lucida flamma micat.
Aptata est novo capiti radiata corona
- 140
- Phoebei referens verticis alta decus.
Crura tegunt squamae Tyrio bis tincta veneno,
Ast ungues roseo tinguit honore color.
Effigies inter pavonis mixta figuram
Cernitur et pictam Phasidis inter avem.
- 145
- Magnitiem terris Arabum quae gignitur ales
Vix aequare potest, seu fera seu sit avis.
Non tamen est tarda ut volucres quae corpore magno
Incessus pigros per grave pondus habent,
Sed levis ac velox, regali plena decore:
- 150
- Talis in aspectu se tenet usque hominum.
Huc venit Aegyptus tanti ad miracula visus
Et raram volucrem turba salutat ovans.
Protinus exsculpunt sacrato in marmore formam
Et titulo signant remque diemque novo.
- 155
- Contrahit in coetum sese genus omne volantum
Nec praedae memor est ulla nec ulla metus.
Alituum stipata choro volat illa per altum,
Turbaque prosequitur munere laeta pio.
Sed postquam puri pervenit ad aetheris auras,
- 160
- Mox redit illa; suis conditur inde locis.
At fortunatam sortis finisque volucrem,
Cui de se nasci praestitit ipse deus!
Femina seu mas sit seu neutrum seu sit utrumque,
Felix quae Veneris foedera nulla colit:
- 165
- Mors illi Venus est, sola est in morte voluptas:
Ut possit nasci, appetit ante mori.
Ipsa sibi proles, suus est pater et suus heres,
Nutrix ipsa sui, semper alumna sibi.
Est eadem sed non eadem, quae est ipsa nec ipsa est,
- 170
- Aeternam vitam mortis adepta bono.
- _____________________
- Textus:
Le mythe du Phénix
dans les littératures grecque et latine
par Jean Hubeaux et Maxime Leroy
Université de Liège
Paris 1939
|
|